محکمہ موسمیات نے ملک کے مختلف علاقوں میں آئندہ 24 سے 48 گھنٹوں کے دوران موسلادھار بارش کی پیشگوئی کرتے ہوئے شہریوں کو احتیاط برتنے کی ہدایت کی ہے۔
نجی ٹی وی چینل (ہم نیوز )کیمطابق بعض مقامات پر بارش کے باعث نشیبی علاقوں میں پانی جمع ہونے اور لینڈ سلائیڈنگ کا بھی خدشہ ظاہر کیا گیا ہے۔محکمہ موسمیات کے مطابق اسلام آباد اور گرد و نواح میں آج بارش ہونے کا امکان ہے، جبکہ چند علاقوں میں موسلادھار بارش بھی ہو سکتی ہے۔
پنجاب کے کئی اضلاع میں بارش کی توقع
پنجاب میں راولپنڈی، مری، گلیات، جہلم، اٹک، چکوال، میانوالی، سرگودھا، گجرات، سیالکوٹ، شیخوپورہ، گوجرانوالہ، حافظ آباد، نارووال، لاہور، فیصل آباد، جھنگ اور ٹوبہ ٹیک سنگھ کے مختلف علاقوں میں بارش متوقع ہے، جس سے درجہ حرارت میں کمی آئے گی۔
خیبرپختونخوا کے پہاڑی اور میدانی علاقوں میں بھی بارش کا سلسلہ جاری رہنے کا امکان
خیبرپختونخوا کے اضلاع پشاور، دیر، چترال، سوات، بونیر، شانگلہ، بٹگرام، ایبٹ آباد، مانسہرہ، ہری پور، مالاکنڈ، مردان، صوابی، باجوڑ، مہمند، کرم، خیبر، کوہاٹ، کرک، لکی مروت، بنوں، وزیرستان اور ٹانک میں بھی گرج چمک کے ساتھ بارش کی توقع ہے۔
سندھ اور بلوچستان کے مخصوص علاقوں میں بارش، بیشتر مقامات پر گرمی برقرار
سندھ کے بیشتر علاقوں میں موسم گرم اور مرطوب رہنے کا امکان ہے، تاہم سانگھڑ، عمر کوٹ، تھرپارکر، مٹھی اور میرپور خاص میں بارش کا امکان ظاہر کیا گیا ہے۔بلوچستان کے بیشتر اضلاع میں بھی موسم گرم رہنے کا امکان ہے، لیکن بارکھان، موسی خیل، لورالائی، خضدار اور آواران میں بارش کی پیشگوئی کی گئی ہے۔
احتیاطی تدابیر کی ضرورت
محکمہ موسمیات نے تمام متعلقہ اداروں کو الرٹ رہنے کی ہدایت کی ہے جبکہ شہریوں کو تاکید کی گئی ہے کہ وہ بارش کے دوران غیر ضروری سفر سے گریز کریں اور نشیبی علاقوں میں رہائش پذیر افراد احتیاطی تدابیر اختیار کریں۔
