پشاور: خیبرپختونخوا اسمبلی میں پاکستان پیپلز پارٹی کے پارلیمانی لیڈر احمد کریم کنڈی نے پیر کے روز اسمبلی اجلاس کے دوران وفاقی حکومت کو شدید تنقید کا نشانہ بنایا۔ انہوں نے مؤقف اپنایا کہ حالیہ نیشنل فنانس کمیشن (این ایف سی) ایوارڈ کی رپورٹ آئین کی خلاف ورزی ہے۔
اجلاس سے خطاب کرتے ہوئے احمد کنڈی نے کہا کہ وفاق نے این ایف سی ایوارڈ کی رپورٹ میں آئینی دفعات کی خلاف ورزی کی ہے۔ اگر صوبائی حکومت خاموش ہے تو اپوزیشن جاگ رہی ہے۔
انہوں نے مطالبہ کیا کہ خیبرپختونخوا اسمبلی وفاقی حکومت، بالخصوص مسلم لیگ (ن) کی قیادت میں قائم موجودہ حکومت کے خلاف ایک مذمتی قرارداد منظور کرے۔
ان کا کہنا تھا کہ ہمیں دیوار سے لگانے پر مجبور نہ کیا جائے۔
ایم پی اے کنڈی نے ایوان میں موجود تمام قانون سازوں پر زور دیا کہ وہ آئینی حقوق کے تحفظ کے لیے متفقہ اور مؤثر مؤقف اختیار کریں۔
ان کا کہنا تھا کہ اسمبلی کو مرکز کو ایک مضبوط پیغام دینا چاہیے تاکہ خیبرپختونخوا کو اس کے جائز آئینی حقوق دیے جائیں۔
یہ بھی پڑھیں : وزیراعظم لیپ ٹاپ اسکیم: درخواست دینے والے طلبا کے لئے بڑی خبر آگئی
ان کے بیان کے جواب میں اسپیکر صوبائی اسمبلی بابرسلیم سواتی نے اجلاس کل (منگل) تک ملتوی کر دیا اور کہا کہ اس معاملے پر کل دوبارہ غور کیا جائے گا۔
