دوحہ/واشنگٹن: اسرائیلی وزیراعظم نیتن یاہو نے قطری وزیراعظم شیخ محمد بن عبدالرحمن آل ثانی سے ٹیلی فون پر رابطہ کر کے دوحہ میں ہونے والے فضائی حملے پر معذرت کر لی، یہ کال واشنگٹن میں وائٹ ہاؤس سے کی گئی۔
خلیج ٹائمز کی رپورٹ کے مطابق اسرائیل کے چینل 12 کے نمائندے باراک راویڈ نے بتایا ہے کہ نیتن یاہو نے قطری ہم منصب سے براہ راست معافی مانگی۔ یہ اقدام ایسے وقت میں سامنے آیا ہے جب اسرائیلی وزیراعظم اور امریکی صدر ڈونلڈ ٹرمپ کے درمیان وائٹ ہاؤس میں ملاقات ہوئی جس میں غزہ میں جنگ بندی اور امن منصوبے پر تبادلہ خیال کیا گیا۔
رپورٹ میں یہ بھی دعویٰ کیا گیا ہے کہ قطری تکنیکی ٹیم بھی ان ملاقاتوں کے دوران وائٹ ہاؤس میں موجود تھی جس سے ظاہر ہوتا ہے کہ قطر کو بھی مذاکراتی عمل میں اہم کردار دیا جا رہا ہے۔
خیال رہے کہ 9 ستمبر کو اسرائیل نے قطر کے دارالحکومت دوحہ میں ایک فضائی حملہ کیا تھا جس میں حماس کے سینئر رہنما خلیل الحیہ کو نشانہ بنانے کی کوشش کی گئی تھی۔ وہ خود تو محفوظ رہے تاہم ان کے بیٹے، ایک قریبی معاون اور دیگر افراد سمیت مجموعی طور پر 6 افراد شہید ہو گئے تھے۔
یہ حملہ اس وقت کیا گیا جب حماس کے نمائندے امریکا کی نئی جنگ بندی تجویز پر غور کرنے کے لیے اجلاس میں مصروف تھے۔ اس واقعے پر عالمی سطح پر شدید ردِ عمل سامنے آیا اور عرب دنیا سمیت پاکستان اور اقوامِ متحدہ نے حملے کی سخت مذمت کی۔
