سیکیورٹی فورسز نے شمالی وزیرستان کے علاقے ٹنگ کلی دتہ خیل میں خفیہ اطلاعات پر مبنی ایک کامیاب انٹیلی جنس بیسڈ آپریشن کے دوران 6 دہشت گردوں کو ہلاک کر دیا۔
کارروائی کے دوران 3 دہشت گرد زخمی ہو گئے، سیکیورٹی ذرائع کے مطابق ہلاک ہونے والوں میں ایک اہم کمانڈر محبوب عرف محمد بھی شامل ہے، جو فتنے الخوارج سے وابستہ تھا۔
ذرائع کے مطابق سیکیورٹی فورسز کو مضافاتی علاقوں میں دہشت گردوں کی مشتبہ نقل و حرکت کی اطلاعات موصول ہوئی تھیں جس کے بعد فورسز نے 8 سے 10 روز تک علاقے کی بھرپور نگرانی کی۔ 16 اکتوبر کو فورسز نے دہشت گردوں کو کامیابی سے گھیرے میں لے کر کارروائی کا آغاز کیا، جس کے دوران شدید فائرنگ کا تبادلہ ہوا۔
سیکیورٹی ذرائع کے مطابق آپریشن علاقے میں امن دشمن عناصر کے خلاف جاری بھرپور کارروائیوں کا تسلسل ہے، عوام اور سیکیورٹی فورسز ملک سے دہشتگردی کے ناسور کو جڑ سے اکھاڑ پھینکنے کے لیے پرعزم ہیں۔
یہ بھی پڑھیں: میر علی میں خوارج کا خودکش حملہ ناکام، چار دہشت گرد ہلاک
ذرائع کے مطابق گزشتہ چار روز میں افغان طالبان کی جانب سے بھیجے گئے 94 خوارج کو بھی ہلاک کیا جا چکا ہے۔ نیشنل ایکشن پلان کے تحت دہشتگردوں کے خلاف بلا امتیاز اور مسلسل کارروائیاں جاری ہیں۔
