فیلڈ مارشل سید عاصم منیر نے مصر کا سرکاری دورہ کیا جس کا مقصد پاکستان اور مصر کے درمیان عسکری تعاون کو مزید فروغ دینا ہے۔
آئی ایس پی آر کے مطابق دورے کے دوران فیلڈ مارشل سید عاصم منیر نے مصری وزیر دفاع جنرل عبدالمجید صقر اور مصری مسلح افواج کے چیف آف اسٹاف لیفٹیننٹ جنرل احمد خلیفہ فتحی سے ملاقاتیں کیں۔
ملاقاتوں میں باہمی دلچسپی کے امور، علاقائی سلامتی کی صورتحال اور دفاعی تعاون کے فروغ پر تفصیلی تبادلہ خیال کیا گیا۔
فیلڈ مارشل سید عاصم منیر نے اس موقع پر کہا کہ مصر ایک برادر اسلامی ملک ہے اور دونوں ممالک کے درمیان قریبی تعلقات خطے میں امن و استحکام کے لیے نہایت اہم کردار ادا کرتے ہیں۔
وزارتِ دفاع پہنچنے پر فیلڈ مارشل سید عاصم منیر کو گارڈ آف آنر پیش کیا گیا۔ انہوں نے نامعلوم سپاہی کی یادگار اور سابق مصری صدر انور السادات کی قبر پر پھول چڑھائے۔
اپنے دورے کے دوران فیلڈ مارشل سید عاصم منیر نے جامعہ الازہر کے شیخِ اعظم احمد الطیب سے بھی ملاقات کی۔ ملاقات میں شیخِ الازہر نے امتِ مسلمہ کو درپیش چیلنجز پر گفتگو کی، جبکہ فیلڈ مارشل سید عاصم منیر نے انتہا پسندانہ نظریات اور اسلام کی مسخ شدہ تشریحات کے خاتمے کی ضرورت پر زور دیا۔
