محکمہ موسمیات نے آج ملک کے بیشتر علاقوں میں موسم خشک رہنے کی پیشگوئی کی ہے، جبکہ پہاڑی علاقوں میں صبح اور رات کے اوقات میں سردی کے اثرات محسوس کیے جائیں گے۔
محکمہ موسمیات کے مطابق مشرقی پنجاب کے اضلاع میں مسلسل خشک موسم اور فضائی آلودگی کے باعث اسموگ کے اثرات برقرار رہنے کا خدشہ ہے۔ شہریوں کو ہدایت کی گئی ہے کہ وہ باہر نکلتے وقت حفاظتی تدابیر اپنائیں تاکہ صحت پر منفی اثرات کم ہوں۔
اسلام آباد اور گردونواح میں آج موسم سرد رہنے کا امکان ہے، جب کہ مری، گلیات اور دیگر پہاڑی علاقوں میں موسم خشک اور خوشگوار رہے گا۔ بلوچستان کے بیشتر اضلاع میں بھی سرد اور خشک موسم کی توقع کی جا رہی ہے۔
مشرقی پنجاب کے شہر سیالکوٹ، خانیوال، رحیم یار خان، بہاولپور، ملتان، لاہور، گوجرانوالہ، قصور، شیخوپورہ، اوکاڑہ اور فیصل آباد میں اسموگ کے اثرات برقرار رہنے کا امکان ہے، جو شہریوں کی روزمرہ زندگی متاثر کر سکتے ہیں۔ سندھ کے جنوب مشرقی ساحلی علاقوں میں جزوی ابر آلود موسم کی پیش گوئی کی گئی ہے۔
خیبرپختونخوا کے زیادہ تر اضلاع، آزاد کشمیر اور گلگت بلتستان میں بھی آج موسم خشک اور سرد رہنے کا امکان ہے۔ گزشتہ 24 گھنٹوں کے دوران ملک کے بیشتر علاقوں میں موسم خشک رہا، جبکہ پہاڑی علاقوں میں سردی محسوس کی گئی۔
محکمہ موسمیات نے شہریوں کو ہدایت دی ہے کہ اسموگ اور سرد موسم کے اثرات سے بچاؤ کے لیے مناسب لباس اور حفاظتی اقدامات اختیار کریں۔
