راولپنڈی ریجن میں غیر قانونی طور پر مقیم افغان شہریوں کے خلاف کریک ڈاؤن جاری ہے، جس کے دوران افغان شہریوں کو دکان اور گھر کرائے پر دینے والے مالکان کے خلاف 79 مقدمات درج کیے گئے ہیں۔
آر پی او راولپنڈی کے ترجمان کے مطابق یہ کارروائیاں راولپنڈی، اٹک، جہلم، چکوال اور مری کے مختلف اضلاع میں کی جا رہی ہیں۔ ترجمان نے بتایا کہ اب تک 14,342 غیر قانونی افغان شہری واپس بھیجے جا چکے ہیں، جبکہ 1,523 افغان شہریوں کو ہولڈنگ سینٹر منتقل کیا جا چکا ہے۔
ترجمان نے عوام کو خبردار کیا کہ غیر قانونی طور پر مقیم غیر ملکیوں کو مکان، دکان یا گاڑی کرائے پر دینا، کاروبار یا ملازمت میں شامل کرنا جرم ہے، اور ایسا کرنے والے مالکان کے خلاف قانونی کارروائی کی جائے گی۔
انہوں نے مزید کہا کہ قانونی طور پر مقیم غیر ملکی اپنی رجسٹریشن متعلقہ تھانے میں ضرور کروائیں تاکہ وہ قانون کے مطابق رہائش، کاروبار یا ملازمت کر سکیں۔
