کرک : انسداد دہشت گردی فورس (سی ٹی ڈی) اور پولیس نے کرک میں ہائی وے پر ناکہ بندی کرنے والے دہشت گردوں کے خلاف مشترکہ کارروائی کرتے ہوئے ایک دہشت گرد کو ہلاک کر دیا۔
محکمہ انسدادِ دہشت گردی خیبر پختونخوا کوہاٹ ریجن اور ڈسٹرکٹ پولیس کرک نے خفیہ اطلاع پر تخت نصرتی کے علاقے مدکی روڈ پر کارروائی کی۔ سی ٹی ڈی کو معلومات ملی تھی کہ علاقے میں مسلح دہشت گرد مسافروں کی تلاشی لے رہے ہیں۔
اطلاع موصول ہوتے ہی سی ٹی ڈی کی سوات ٹیمیں اور پولیس کی بھاری نفری نے علاقے کا گھیراؤ کیا۔
دہشت گردوں نے فورسز کو دیکھ کر اندھا دھند فائرنگ شروع کر دی، جس کے جواب میں پولیس نے حقِ خود اختیاری کے تحت جوابی کارروائی کی۔
دونوں جانب سے فائرنگ کا تبادلہ تقریباً پچیس منٹ تک جاری رہا، جس کے نتیجے میں ایک دہشت گرد ہلاک ہوا جبکہ باقی دہشت گرد رات کی تاریکی میں فرار ہونے میں کامیاب ہو گئے۔
بعد ازاں سرچ اینڈ کلیئرنس آپریشن کے دوران ایک کلاشنکوف، دو میگزین، ایک دستی بم اور متعدد کارتوس برآمد ہوئے۔
یہ بھی پڑھیں : 27 ویں ترمیم پر ابھی مشاورت کا آغاز، اتفاق رائے کے بغیر کوئی آئینی ترمیم نہیں ہوگی، رانا ثنا
پولیس نے علاقے کو مکمل طور پر سیل کر دیا اور فرار دہشت گردوں کی گرفتاری کے لیے سرچ آپریشن کا دائرہ وسیع کر دیا ہے۔
سی ٹی ڈی کے مطابق یہ کارروائی صوبے میں دہشت گردوں کی سرگرمیوں کے خاتمے اور شہریوں کے تحفظ کو یقینی بنانے کے لیے جاری حکمت عملی کا حصہ ہے۔
