سوات، شکردرہ میں ممتاز علی خان کی گاڑی کے قریب دھماکہ، رہنما محفوظ ہے ۔
تفصیلات کے مطابق تحصیل مٹہ کے علاقے شکردرہ میں عوامی نیشنل پارٹی (اے این پی) کے رہنما ممتاز علی خان کی گاڑی کے قریب دھماکہ ہوا، تاہم خوش قسمتی سے رہنما محفوظ رہے۔
ڈی پی او سوات کے مطابق دھماکے میں گاڑی کو معمولی نقصان پہنچا اور کوئی جانی نقصان نہیں ہوا۔ ابتدائی تحقیقات سے معلوم ہوا ہے کہ راستے میں بارودی مواد نصب کیا گیا تھا۔
پولیس نے فوری طور پر بھاری نفری کے ہمراہ جائے وقوعہ کا معائنہ کیا اور علاقے کو گھیرے میں لے لیا۔ ڈی پی او سوات نے بتایا کہ واقعے کی مزید تحقیقات جاری ہیں اور دھماکے کے ذمہ داروں کو جلد گرفتار کرنے کی کوشش کی جا رہی ہے۔
مقامی انتظامیہ اور سکیورٹی فورسز نے علاقے میں سیکیورٹی ہائی الرٹ کر دی ہے تاکہ کسی بھی ممکنہ خطرے سے نمٹا جا سکے۔
اس دھماکے کے بعد اے این پی اور دیگر سیاسی حلقوں نے رہنما کی حفاظت کو یقینی بنانے اور ایسے حملوں کی شدید مذمت کرنے کا اعلان کیا ہے۔
تحصیل مٹہ میں سکیورٹی فورسز کی موجودگی بڑھا دی گئی ہے اور مقامی عوام کو احتیاط برتنے کی ہدایت دی گئی ہے۔
