خیبر پختونخوا اسمبلی میں اپوزیشن لیڈر ڈاکٹر عباد اللّٰہ نے کہا ہے کہ پاکستان تحریک انصاف (پی ٹی آئی) کے ناراض اراکین سے اپوزیشن کو کوئی خطرہ لاحق نہیں، اپوزیشن اور حکومت کے درمیان معاملات طے پا چکے ہیں۔
ایک میڈیا گفتگو کے دوران ڈاکٹر عباد اللّٰہ نے واضح کیا کہ اگر بات انتخابات کی طرف گئی تو اپوزیشن حکومت کے ساتھ مل کر معاملات طے کرے گی، اور اس حوالے سے باقاعدہ ملاقات متوقع ہے۔
قومی اخبار (روزنامہ جنگ ویب سائٹ ) کے مطابق انہوں نے خبردار کیا کہ اگر اسمبلی اجلاس کے دوران کورم کی نشاندہی کی گئی، تو یہ سیاسی ناپختگی اور بے وقوفی کے مترادف ہو گا۔ ان کا کہنا تھا کہ اپوزیشن مکمل سنجیدگی کے ساتھ پارلیمانی امور میں حصہ لے رہی ہے اور موجودہ صورت حال کو قانونی دائرے میں حل کرنا چاہتی ہے۔
ڈاکٹر عباد اللّٰہ نے مزید بتایا کہ مخصوص نشستوں سے متعلق ایک درخواست تیار کر لی گئی ہے، اور یہ معاملہ اب براہ راست چیف جسٹس پشاور ہائیکورٹ کے سامنے پیش کیا جائے گا۔ ان کے مطابق، چیف جسٹس خود مخصوص نشستوں پر ارکان سے حلف لے سکتے ہیں یا کسی مناسب شخصیت کو نامزد کر سکتے ہیں۔
اپوزیشن لیڈر کا مؤقف ایسے وقت میں سامنے آیا ہے جب خیبر پختونخوا کی سیاست میں مخصوص نشستوں اور کورم کے معاملات پر غیر یقینی کی کیفیت جاری ہے۔ ان بیانات سے واضح ہوتا ہے کہ اپوزیشن حکومت کے ساتھ کسی ممکنہ سیاسی تصادم سے بچنے کی کوشش کر رہی ہے۔
