شمالی وزیرستان: خیبر پختونخوا کے ضلع شمالی وزیرستان میں بجلی کی سپلائی گزشتہ 6 روز سے معطل ہے، جس کی وجہ سے مقامی شہری شدید مشکلات کا سامنا کر رہے ہیں۔
بکا خیل کے پہاڑی علاقے میں 6 روز قبل تیز ہواؤں کے باعث بجلی کے 3 ٹاورز ٹوٹ گئے تھے، جس کے نتیجے میں پورے علاقے میں بجلی کی فراہمی بند ہو گئی ہے۔
مقامی افراد کا کہنا ہے کہ بجلی کی بندش سے زندگی اجیرن ہو گئی ہے، خاص طور پر گرمی کے موسم میں پانی کی کمی اور دیگر ضروریات کی فراہمی میں مشکلات پیش آ رہی ہیں۔ علاقے میں کاروبار بھی متاثر ہو رہے ہیں، جبکہ تعلیمی اداروں اور اسپتالوں میں بھی بجلی کی کمی سے کام کاج متاثر ہو رہا ہے۔
ٹرائبل الیکٹرک سپلائی کمپنی (ٹیسکو) کے حکام نے بتایا ہے کہ بجلی کے ٹاورز کی مرمت کے عمل میں مزید وقت لگ سکتا ہے، اور ممکنہ طور پر اس میں مزید تاخیر ہو سکتی ہے۔
یہ بھی پڑھیں شمالی وزیرستان سے تیل اور گیس کے نئے ذخائر دریافت
ٹیسکو حکام نے عوام سے اپیل کی ہے کہ وہ صورتحال کو سمجھیں اور کمپنی کی جانب سے مرمت کے کام کو مکمل کرنے کے لیے تعاون کریں۔
