محمد شعیب مہمند
ضلع مہمند (ویب ڈیسک): پنڈیالئ ڈیم کلے میں جاری سپورٹس گالا رنگا رنگ تقریبات اور جوش و خروش کے ساتھ اختتام پذیر ہو گیا۔ سپورٹس گالا کی اختتامی تقریب میں اہم سیاسی و انتظامی شخصیات نے شرکت کی۔
اختتامی تقریب کے مہمانانِ خصوصی میں رکن صوبائی اسمبلی (ایم پی اے) محبوب شیر، پاکستان تحریک انصاف (پی ٹی آئی) کے ضلعی صدر و ناظم اعلیٰ لوئر مہمند ملک نوید احمد مہمند، اسسٹنٹ کمشنر اویس خان، اور ضلعی سپورٹس آفیسر فیصل جاوید شامل تھے۔
سپورٹس گالا میں تحصیل پنڈیالئ کے نوجوانوں نے بھرپور جوش و جذبے کے ساتھ شرکت کی اور مختلف کھیلوں میں اپنی مہارت کا مظاہرہ کیا۔ گالا میں فٹبال، کرکٹ، والی بال، ریس اور روایتی کھیلوں سمیت مختلف مقابلے منعقد کیے گئے جنہوں نے مقامی نوجوانوں کی صلاحیتوں کو اجاگر کیا۔
مہمانانِ خصوصی نے نوجوانوں کے جذبے کو سراہا اور کامیاب ایونٹ کے انعقاد پر منتظمین کو مبارکباد دی۔ ایم پی اے محبوب شیر نے کہا کہ ایسے ایونٹس نوجوانوں کو مثبت سرگرمیوں کی جانب راغب کرتے ہیں اور علاقے میں امن، ہم آہنگی اور صحت مندانہ تفریح کو فروغ دیتے ہیں۔
یہ بھی پڑھیں ایبٹ آباد: فی میل اسپورٹس گالا کا شاندار اختتام، کھلاڑیوں کی عمدہ کارکردگی
ضلعی سپورٹس آفیسر فیصل جاوید نے کہا کہ مہمند کے نوجوانوں میں بے پناہ ٹیلنٹ موجود ہے، جسے نکھارنے کے لیے ضلعی سطح پر مزید سپورٹس ایونٹس منعقد کیے جائیں گے۔
علاقے کے عوام نے سپورٹس گالا کے کامیاب انعقاد کو سراہا اور حکومت سے مطالبہ کیا کہ مستقبل میں بھی ایسے پروگرامز جاری رکھے جائیں تاکہ نوجوانوں کو اپنی صلاحیتوں کے اظہار کے لیے بھرپور مواقع میسر آئیں۔
