سیکرٹری خارجہ آمنہ بلوچ نے غیر ملکی سفیروں کو ایک اہم بریفنگ دی جس میں پاک بھارت کشیدگی، مقبوضہ کشمیر کی صورتحال، اور پاکستان میں بھارتی مداخلت پر تفصیلی روشنی ڈالی گئی۔ بریفنگ سفارتی ذرائع کی جانب سے سامنے آنے والی معلومات کی روشنی میں دی گئی۔
ذرائع کے مطابق آمنہ بلوچ نے بریفنگ میں کہا کہ پاکستان بھارت کے مسلسل جارحانہ رویے کا سامنا کر رہا ہے اور اس کے خلاف پاکستان کے اقدامات مکمل طور پر جائز اور دفاعی نوعیت کے ہیں۔ انہوں نے مقبوضہ کشمیر میں انسانی حقوق کی سنگین خلاف ورزیوں اور بھارت کی جانب سے پاکستان میں دہشت گردی کی کارروائیوں پر شدید تشویش کا اظہار کیا۔
آمنہ بلوچ نے کہا کہ پاکستان خود دہشت گردی کا شکار رہا ہے اور اس نے دہشت گردی کے خلاف جنگ میں 70 ہزار سے زائد قیمتی جانوں کی قربانی دی ہے۔ انہوں نے بھارت پر الزام لگایا کہ وہ نہ صرف پاکستان کے اندرونی معاملات میں مداخلت کر رہا ہے بلکہ مختلف تخریبی کارروائیوں میں بھی ملوث رہا ہے۔
انہوں نے بھارتی جاسوس کلبھوشن جادیو کو بھارتی ریاستی دہشت گردی کا زندہ ثبوت قرار دیا اور کہا کہ بھارت کے عزائم خطے کے امن و استحکام کے لیے ایک بڑا خطرہ ہیں۔ آمنہ بلوچ نے خبردار کیا کہ بھارت کی جانب سے کسی بھی قسم کی غلط فہمی یا “مس کیلکولیشن” پورے جنوب مشرقی ایشیا کے لیے خطرناک نتائج لا سکتی ہے۔
آخر میں انہوں نے واضح کیا کہ پاکستان ہر صورت میں اپنے دفاع کے لیے مکمل طور پر تیار ہے اور ملکی سالمیت پر کوئی سمجھوتہ نہیں کیا جائے گا۔
