پاکستان اور بھارت کے درمیان بڑھتی ہوئی کشیدگی کے پیش نظر حکومت نے قومی اسمبلی کا اجلاس بلانے کا فیصلہ کیا ہے۔
جمعہ کو وزیر دفاع خواجہ آصف کی زیر صدارت پارلیمنٹ ہاؤس میں مشاورتی اجلاس منعقد ہوا، جس میں وزیر قانون اعظم نذیر تارڑ، وزیر پارلیمانی امور طارق فضل چوہدری، اور وزیر مملکت بیرسٹر عقیل نے شرکت کی۔
اجلاس میں پاک بھارت کشیدگی کی موجودہ صورتحال اور اس پر قومی اسمبلی میں بھارت کے خلاف مذمتی قرارداد لانے پر تفصیلی مشاورت کی گئی۔
ذرائع کے مطابق اجلاس میں بھارت کے خلاف مذمتی قرارداد کے مسودے پر بھی غور کیا گیا اور اس کی منظوری کے لیے اقدامات کیے گئے۔
یہ بھی پڑھیں قومی اسمبلی اجلاس میں بھارت کیخلاف مذمتی قرارداد پیش کرنے کا فیصلہ
اجلاس کے دوران یہ فیصلہ کیا گیا کہ 5 مئی کو قومی اسمبلی کا اجلاس طلب کیا جائے گا۔ اس اجلاس میں قومی سلامتی کے امور پر قومی اتفاق رائے پیدا کرنے اور اپوزیشن سے بات چیت پر بھی مشاورت کی گئی۔
حکومتی ذرائع نے بتایا کہ قومی اسمبلی میں موجودہ کشیدگی اور قومی سلامتی کے حوالے سے متفقہ موقف اپنانے کے لیے تمام سیاسی جماعتوں سے مشاورت کی جائے گی۔
