مینگورہ سمیت گردونواح میں زلزلے کے جھٹکے محسوس کیے گئے،ریکٹر اسکیل پر زلزلے کی شدت 4.2 ریکارڈ ، جبکہ اس کا مرکز افغانستان کے کوہ ہندوکش کے علاقے میں تھا۔
تفصیلات کے مطابق سوات کے مرکزی شہر مینگورہ سمیت گردونواح میں زلزلے کے جھٹکے محسوس کیے گئے، جس سے شہریوں میں خوف و ہراس پھیل گیا، زلزلے کے باعث لوگ گھروں اور عمارتوں سے کلمہ طیبہ کا ورد کرتے ہوئے باہر نکل آئے۔
زلزلہ پیما مرکز کے مطابق ریکٹر اسکیل پر زلزلے کی شدت 4.2 ریکارڈ کی گئی، جبکہ اس کا مرکز افغانستان کے کوہ ہندوکش کے علاقے میں تھا۔ زیر زمین گہرائی 156 کلومیٹر ریکارڈ کی گئی، جس کے باعث زلزلے کی شدت نسبتاً کم محسوس ہوئی۔
ابتدائی اطلاعات کے مطابق زلزلے کے جھٹکے چند سیکنڈز تک جاری رہے، تاہم کسی قسم کے جانی یا مالی نقصان کی کوئی اطلاع موصول نہیں ہوئی۔ ریسکیو ذرائع اور مقامی انتظامیہ صورت حال پر نظر رکھے ہوئے ہیں۔
محکمہ موسمیات کے ماہرین کا کہنا ہے کہ کوہ ہندوکش کا علاقہ زلزلہ خیز زون میں شامل ہے، جہاں معمولی شدت کے زلزلے وقفے وقفے سے آتے رہتے ہیں۔
