وزیراعظم شہبا زشریف نےکہا ہے کہ افواج پاکستان کی قربانیوں کو کبھی فراموش نہیں کیا جا سکتا، اور قوم ان کے شانہ بشانہ کھڑی ہے۔
تفصیلات کے مطابق وزیراعظم محمد شہباز شریف نے بھارت کی جارحیت کا مؤثر جواب دینے اور آپریشن ’’بنیان مرصوص‘‘ کی کامیابی پر آج ملک بھر میں یومِ تشکر منانے کا اعلان کیا ہے۔ وزیراعظم کا کہنا تھا کہ یہ دن اللہ کی بارگاہ میں سجدہ شکر بجا لانے، افواج پاکستان کی بے مثال بہادری کو خراج تحسین پیش کرنے اور پوری قوم کے حوصلے و وحدت کو سراہنے کے لیے منایا جائے گا۔
وزیراعظم شہباز شریف نے کہا کہ آپریشن ’’بنیان مرصوص‘‘ نے دشمن کی جارحیت کا مؤثر اور بھرپور جواب دیا، اور پاکستان نے ہر محاذ پر برتری ثابت کی۔ انہوں نے اس کامیابی پر اللہ تعالیٰ کا شکر ادا کیا اور کہا کہ ہمیں اللہ کی مدد سے سرخروئی حاصل ہوئی۔
وزیراعظم نے کہا کہ دشمن کی جارحیت کے باوجود پاکستان نے صبر و تحمل اور مکمل تیاری کے ساتھ اپنے دفاع کو یقینی بنایا۔ انہوں نے قوم بالخصوص علماء کرام سے اپیل کی کہ وہ آج پورے ملک میں اجتماعی دعاؤں اور نفل عبادات کا اہتمام کریں، اللہ کا شکر ادا کریں اور شہداء و غازیوں کے لیے خصوصی دعائیں کریں۔
وزیراعظم نے مزید کہا کہ افواج پاکستان کی قربانیوں کو کبھی فراموش نہیں کیا جا سکتا، اور قوم ان کے شانہ بشانہ کھڑی ہے۔
