وزیر اعلی خیبر پختونخوا علی امین گنڈاپور کی زیر صدارت اگلے سالانہ ترقیاتی پروگرام کی تیاری کے لئے مشاورتی اجلاس منعقد ہوا۔ اجلاس میں ملاکنڈ ڈویژن کے اگلے سالانہ ترقیاتی پروگرام کی تیاری کے لئے طویل مشاورت کی گئی۔
ملاکنڈ ڈویژن کے منتخب ممبران قومی و صوبائی اسمبلی نےاجلاس میں شرکت کی۔ اجلاس میں وزیراعلی علی امین گنڈاپور نے ملاکنڈ ڈویژن کو دو الگ ڈویژنز بنانے کا اعلان کیا۔
علی امین گنڈاپور نے اجلاس سےخطاب کرتےہوئے کہاکہ ملاکنڈ بہت وسیع رقبے پر پھیلا ہوا پہاڑی علاقہ ہے، لوگوں کی سہولت کے لئے اسے دو ڈویژنز میں تقسیم کرنا ضروری ہے۔
وزیر اعلی نے کہاکہ انتظامی یونٹس چھوٹے ہونے سے سروس ڈیلیوری اور گورننس میں بہتری آئے گی، ملاکنڈ ڈویژن کے منتخب عوامی نمائندے آپس میں مشاورت کرکے دو الگ الگ ڈویژنز کے قیام کے لئے جزئیات طے کریں۔
ملاکنڈ ڈویژن کے منتخب عوامی نمائندوں نے وزیر اعلی کے اس اعلان کا خیر مقدم کرتے ہوئے کہاکہ ملاکنڈ ڈویژن کو دو ڈویژنز میں تقسیم کرنا علاقے کا عوام کا دیرینہ مطالبہ اور وقت کی اشد ضرورت تھی۔
انہوں نے کہاکہ ہم اس اعلان پر وزیر اعلی کا تہہ دل سے مشکور ہیں۔
یہ بھی پڑھیں:افواج پاکستان نے دشمن کی جارحیت کا فوری اور فیصلہ کن جواب دیا ،وزیراعظم
اجلاس میں ملاکنڈ ڈویژن کے رواں سالانہ ترقیاتی پروگرام پر پیشرفت کا بھی جائزہ لیاگیا۔
