جنوبی وزیرستان لوئر اور اپر اضلاع میں سکیورٹی خدشات کے باعث صبح 6 بجے سے شام 7 بجے تک کرفیو نافذ کر دیا گیا ہے، جس کے تحت عوامی نقل و حرکت اور تمام کاروباری سرگرمیوں پر مکمل پابندی عائد کر دی گئی ہے۔
ڈپٹی کمشنر جنوبی وزیرستان لوئر ناصر خان کے مطابق وانا شہر اور گرد و نواح میں کرفیو نافذ کرنے کا بنیادی مقصد ممکنہ سیکیورٹی خطرات کا تدارک اور علاقے میں امن و امان برقرار رکھنا ہے۔
جاری کردہ نوٹیفکیشن کے مطابق شہریوں کو سختی سے ہدایت کی گئی ہے کہ وہ سیکیورٹی فورسز کی گاڑیاں دیکھ کر کم از کم 50 میٹر کے فاصلے پر اپنی گاڑیاں روک دیں، تاکہ کسی بھی ناخوشگوار واقعے سے بچا جا سکے۔
جنوبی وزیرستان اپر کے ڈپٹی کمشنر فضل ودود کے مطابق ضلع بھر کی تمام تحصیلوں میں بھی مکمل کرفیو نافذ ہے، اور تمام اقسام کی نقل و حرکت اور تجارتی سرگرمیوں پر پابندی عائد ہے۔ ضلعی انتظامیہ کی جانب سے عوام سے تعاون کی اپیل کی گئی ہے تاکہ سکیورٹی ادارے مؤثر انداز میں اپنی ذمہ داریاں ادا کر سکیں۔
واضح رہے کہ علاقے میں حالیہ سیکیورٹی صورتحال کے پیش نظر یہ اقدامات احتیاطی تدبیر کے طور پر کیے جا رہے ہیں۔ متعلقہ حکام کا کہنا ہے کہ عوام کی جان و مال کا تحفظ اولین ترجیح ہے۔
