اسلام آباد:وزیراعظم شہباز شریف سے ترکیہ کے وزیر خارجہ ہاکان فیدان اور وزیر قومی دفاع یاسر گلر نے ملاقات کی۔ اس اہم ملاقات میں دونوں ممالک کے درمیان دوطرفہ تعلقات کو اسٹریٹجک شراکت داری میں تبدیل کرنے اور کثیرالجہتی شعبوں میں تعاون بڑھانے پر اتفاق کیا گیا۔
ملاقات میں پاکستان کی جانب سے نائب وزیراعظم و وزیر خارجہ اسحاق ڈار، وزیر دفاع خواجہ آصف،فیلڈ مارشل سید عاصم منیر، قومی سلامتی کے مشیر لیفٹیننٹ جنرل (ر) محمد عاصم ملک اور دیگر اعلیٰ حکام شریک ہوئے۔
وزیراعظم نے ترک وفد کا خیر مقدم کرتے ہوئے پاکستان اور ترکیے کے مابین دیرینہ اور برادرانہ تعلقات پر روشنی ڈالی جو مشترکہ تاریخ، ثقافت اور باہمی احترام پر مبنی ہیں۔ شہباز شریف نے ان تعلقات کو اسٹریٹجک شراکت داری میں بدلنے کے عزم کا اعادہ کیا۔
انہوں نے تجارت، سرمایہ کاری، ٹیکنالوجی اور دفاع سمیت مختلف شعبوں میں تعاون بڑھانے کے لیے پاکستان کے غیر متزلزل عزم کا اظہار کیا۔ وزیراعظم نے ترکیہ کے صدر رجب طیب اردوان کے ساتھ 17ویں ای سی او سربراہی اجلاس سمیت ہونے والی ملاقاتوں کا بھی حوالہ دیا۔
وزیراعظم نے ہاکان فیدان اور اسحاق ڈار کی مشترکہ صدارت میں ہونے والے مشترکہ کمیشن کے اجلاس کا خیرمقدم کرتے ہوئے امید ظاہر کی کہ اس سے دوطرفہ تعلقات مزید وسعت اختیار کریں گے۔
یہ بھی پڑھیں : اسلام آباد پر چڑھائی کا خواب دیکھنے والوں کو مایوسی ہوگی، سینیٹر افنان اللہ
انہوں نے زور دیا کہ بدلتے ہوئے علاقائی و عالمی حالات خصوصاً غزہ اور ایران کی صورتحال کے پیش نظر پاکستان اور ترکیہ کے درمیان قریبی مشاورت ضروری ہے۔
شہباز شریف نے بھارت سے حالیہ کشیدگی کے دوران پاکستان کی غیر مشروط حمایت پر ترک قیادت کا شکریہ ادا کیا۔ انہوں نے دوطرفہ تجارت کو 5 ارب ڈالر کے ہدف تک پہنچانے کے لیے سنجیدہ کوششوں کی ضرورت پر زور دیا۔
ملاقات کے اختتام پر وزیراعظم نے ترک کمپنیوں کو پاکستان میں سرمایہ کاری کے مواقع سے فائدہ اٹھانے اور ملک کی اقتصادی ترقی میں شراکت کی دعوت دی۔
