پشاور: خیبرپختونخوا اور گلگت بلتستان کے بعض اضلاع میں انسداد پولیو کی خصوصی مہم 14 جولائی سے شروع کی جا رہی ہے، جو 18 جولائی تک جاری رہے گی۔
اس دوران 1 لاکھ 58 ہزار سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
ذرائع کے مطابق مہم کا دائرہ کوہستان اپر، کوہستان لوئر اور کولائی پالس سمیت دیامر کے علاقوں تک پھیلایا گیا ہے، جہاں پولیو وائرس کے خطرات کو مدنظر رکھتے ہوئے خصوصی حکمت عملی اپنائی جا رہی ہے۔
نیشنل ایمرجنسی آپریشن سینٹر (EOC) کے مطابق ہائی رسک یونین کونسلز پر توجہ مرکوز کی جا رہی ہے تاکہ وائرس کے پھیلاؤ کو مؤثر طور پر روکا جا سکے۔
والدین سے اپیل کی گئی ہے کہ وہ ہر بار بچوں کو انسداد پولیو کے قطرے ضرور پلوائیں اور حفاظتی ٹیکوں کا مکمل کورس یقینی بنائیں۔
حکام کا کہنا ہے کہ پولیو ویکسین بچوں کو عمر بھر کی معذوری سے بچانے کا مؤثر ذریعہ ہے۔
