ایشیائی ترقیاتی بینک (اے ڈی بی ) نے ترقی پذیر ایشیا اور بحرالکاہل کے ممالک کی معیشتوں پر جاری اپنی تازہ ترین رپورٹ میں پاکستان میں مہنگائی میں کمی اور شرح نمو کے 3 فیصد تک رہنے کی پیشگوئی کی ہے۔
رپورٹ کے مطابق پاکستان میں مہنگائی میں متوقع کمی کی اہم وجہ خوراک اور دیگر بنیادی اشیائے ضروریہ کی قیمتوں میں کمی ہو سکتی ہے۔ بینک نے 2025-26 کے دوران پاکستان میں مہنگائی کی شرح 5.8 فیصد رہنے کا تخمینہ بھی برقرار رکھا ہے۔
ایشیائی ترقیاتی بینک کے مطابق پاکستان کی معاشی شرح نمو رواں برس 3 فیصد رہنے کا امکان ہے۔ اگرچہ یہ شرح بلند نہیں، لیکن معاشی استحکام کی طرف ایک مثبت قدم قرار دی جا رہی ہے۔ رپورٹ میں کہا گیا ہے کہ اگر حکومت مالیاتی نظم و ضبط اور اصلاحات پر توجہ دے تو آئندہ برسوں میں مزید بہتری ممکن ہے۔
نجی ٹی وی چینل (سما نیوز)کے مطابق رپورٹ میں اس بات پر بھی روشنی ڈالی گئی ہے کہ امریکا کی جانب سے اضافی ٹیرف کے نفاذ سے ایشیائی معیشتوں پر منفی اثرات مرتب ہو سکتے ہیں۔ ان اقدامات سے عالمی تجارتی غیر یقینی صورتحال پیدا ہو رہی ہے، جس کے نتیجے میں برآمدات میں کمی اور معاشی ترقی کی رفتار متاثر ہو سکتی ہے۔
رپورٹ کے مطابق جنوبی ایشیائی خطے کی مجموعی معیشت 2026 تک 6.2 فیصد کی شرح سے ترقی کرے گی، جبکہ مہنگائی 4.5 فیصد رہنے کا امکان ظاہر کیا گیا ہے۔ ماہرین کے مطابق یہ اعداد و شمار خطے میں معاشی بہتری کی امید دلاتے ہیں۔
ایشیائی ترقیاتی بینک رپورٹ پاکستان کے لیے ایک محتاط لیکن مثبت اشارہ ہے۔ مہنگائی میں ممکنہ کمی اور معیشت میں تدریجی بہتری حکومت کے لیے پالیسی سازی کے اہم مواقع پیدا کر سکتی ہے، بشرطیکہ عالمی سطح پر تجارتی دباؤ کا مؤثر جواب دیا جائے۔
