مشیر اطلاعات خیبرپختونخوا بیرسٹر محمد علی سیف کی سربراہی میں 12 رکنی اعلیٰ سطحی وفد چین روانہ ہو گیا ہے۔
قومی اخبار(روزنامہ جنگ ویب سائٹ)کے مطابق یہ دورہ چینی وزارت خارجہ کی دعوت پر بین الاقوامی مذہبی سفارتکاری پروگرام کے تحت کیا جا رہا ہے، جس کا مقصد پاکستان، چین اور مسلم دنیا کے درمیان مذہبی، سماجی اور ثقافتی تعلقات کو فروغ دینا ہے۔
وفد میں خیبرپختونخوا کے وزیر مذہبی امور عدنان قادری، وزیر سماجی بہبود قاسم علی شاہ، سینیئر سیاستدان سکندر شیرپاؤ، ڈی جی اسلامک ریسرچ انسٹیٹیوٹ ڈاکٹر ضیاء، ترجمان وفاق المدارس مولانا عبدالقدوس، اور نائب صدر دارالعلوم کراچی مولانا زبیر اشرف عثمانی سمیت دیگر اہم مذہبی، تعلیمی اور سماجی رہنما شامل ہیں۔
روانگی سے قبل میڈیا سے گفتگو کرتے ہوئے بیرسٹر سیف نے بتایا کہ وفد بیجنگ، ارومچی اور کاشغر کا دورہ کرے گا جہاں وہ چینی وزارت خارجہ کے حکام، کمیونسٹ پارٹی قیادت، مسلم رہنماؤں اور تعلیمی اداروں سے ملاقاتیں کرے گا۔
انہوں نے کہا کہ اس دورے کا مقصد بین المذاہب مکالمے، مذہبی ہم آہنگی اور ثقافتی روابط کو فروغ دینا ہے تاکہ پاکستان اور چین کے باہمی تعلقات مزید مضبوط ہوں۔
بیرسٹر سیف نے امید ظاہر کی کہ یہ دورہ دونوں ممالک کے درمیان دوستی، ہم آہنگی اور اعتماد کے رشتے کو نئی بلندیوں تک لے جائے گا۔
