اسلام آباد : پاکستان تحریک انصاف کے رہنما حافظ فرحت عباس نے کہا ہے کہ بانی پی ٹی آئی عمران خان کے بیٹوں سلیمان اور قاسم کا سیاست سے کوئی تعلق نہیں، اگر وہ امریکا گئے بھی ہیں تو صرف اپنے والد سے ملاقات کے لیے گئے ہیں، نہ کہ کسی سیاسی مشن پر۔
نجی ٹی وی ہم نیوز کے پروگرام میں گفتگو کرتے ہوئے حافظ فرحت عباس نے واضح کیا کہ عمران خان کے بیٹے اگر پاکستان آئیں گے تو وہ بھی صرف والد سے ملاقات کے لیے آئیں گے، ان کا پارٹی یا سیاست سے کوئی تعلق نہیں۔
انہوں نے اس بات پر بھی زور دیا کہ آئندہ تحریک انصاف کی احتجاجی تحریک کو پارٹی کی باقاعدہ قیادت ہی لیڈ کرے گی۔
علیمہ خان کے حوالے سے بات کرتے ہوئے انہوں نے کہا کہ ان کے پاس تحریک انصاف میں کوئی عہدہ نہیں اور وہ کسی تنظیمی فیصلے میں شامل نہیں ہوتیں۔
یہ بھی پڑھیں : بانی پی ٹی آئی کے بیٹوں کو پاکستان آنے سے روکنے پر خواجہ آصف کا بیان سامنے آ گیا
اسمبلی میں حالیہ گالم گلوچ اور ہاتھاپائی کے واقعات پر تبصرہ کرتے ہوئے حافظ فرحت عباس نے کہا کہ ایسے غیر پارلیمانی رویے قابلِ مذمت ہیں۔ انہوں نے زور دیا کہ پارلیمان میں نظم و ضبط کا خیال رکھنا سب اراکین کی ذمہ داری ہے۔
