نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں موسمی حالات کے حوالے سے 3 اگست تک شدید الرٹ جاری کیا ہے۔
ترجمان کے مطابق مختلف علاقوں میں اربن فلڈنگ اور ندی نالوں میں طغیانی کے امکانات موجود ہیںجس کے پیش نظر متعلقہ اداروں کو بروقت اقدامات کرنے کی ہدایت کی گئی ہے۔
این ڈی ایم اے کا کہنا ہے کہ گلگت بلتستان اور خیبرپختونخوا میں گلیشئر جھیلوں کے سیلاب (گلاف) کا خطرہ شدت اختیار کر چکا ہے جبکہ اسلام آباد، راولپنڈی، گوجرانوالہ، لاہور، سیالکوٹ اور خوشاب جیسے شہروں میں اربن فلڈنگ کی صورتحال متوقع ہے۔
ان علاقوں میں ندی نالوں کا بہاؤ بڑھنے کا امکان ہے جس کے باعث سیلابی صورتحال پیدا ہو سکتی ہے۔
ترجمان نے مزید بتایا کہ خیبرپختونخوا کے مختلف علاقوں میں اگلے 12 سے 24 گھنٹوں کے دوران موسلا دھار بارشوں کا امکان ہےجس کی وجہ سے نشیبی علاقوں میں اچانک سیلاب آ سکتا ہے جبکہ پہاڑی علاقوں میں لینڈ سلائیڈنگ کا بھی خطرہ بڑھ گیا ہے۔
این ڈی ایم اے نے چترال، دیر، سوات، کالام، مانسہرہ اور بٹگرام سمیت دیگر علاقوں میں بارشوں کی پیشگوئی کی ہے، جبکہ ایبٹ آباد، ہری پور، صوابی، مردان، پشاور اور چارسدہ میں بھی بارش متوقع ہے۔
کوہاٹ، ہنگو، بنوں، لکی مروت اور ڈی آئی خان میں بھی شدید بارشوں کا امکان ظاہر کیا گیا ہے۔گلگت بلتستان اور خیبر پختونخوا میں جھیلوں کے پھٹنے کے باعث سیلابی صورتحال کا خطرہ ہے جس کے پیش نظر این ڈی ایم اے نے متعلقہ حکام کو تمام ممکنہ خطرات سے نمٹنے اور عوام کی حفاظت کے لیے فوری تیاریاں مکمل کرنے کی ہدایت جاری کی ہے۔
