پشاور: وزیراعلیٰ خیبرپختونخوا علی امین گنڈاپور نے صوبے میں تعلیمی بہتری کی جانب ایک اہم قدم اٹھاتے ہوئے “علم پیکٹ پروگرام” کا باضابطہ آغاز کر دیا ہے۔
اس اقدام کا بنیادی مقصد ان بچوں کو تعلیم کے دائرے میں لانا ہے جو کسی وجہ سے اسکول جانے سے محروم رہ گئے ہیں جبکہ ساتھ ہی تعلیمی معیار کو بہتر بنانا بھی اس پروگرام کا اہم ہدف ہے۔
علم پیکٹ پروگرام کی افتتاحی تقریب وزیراعلیٰ ہاؤس پشاور میں منعقد ہوئی جہاں وزیراعلیٰ علی امین گنڈاپور نے مہمان خصوصی کی حیثیت سے شرکت کی۔
اس موقع پر برٹش کونسل کے کنٹری ڈائریکٹر جیمز ہیمپسن، صوبائی وزیر تعلیم فیصل ترکئی اور محکمہ تعلیم کے اعلیٰ افسران بھی موجود تھے۔
یہ پروگرام برطانیہ کی حکومت کے ادارے ایف سی ڈی او کے تعاون سے شروع کیا گیا ہے جو خیبرپختونخوا میں تعلیم کے فروغ کے لیے حکومت کے ساتھ شراکت دار کے طور پر کام کر رہا ہے۔
تقریب سے خطاب کرتے ہوئے وزیراعلیٰ نے کہا کہ موجودہ حکومت نے رواں تعلیمی سال کے دوران دس لاکھ بچوں کو اسکولوں میں داخل کرانے کا ہدف مقرر کیا ہے۔
ان کا کہنا تھا کہ ابتدائی مرحلے میں آٹھ اضلاع بٹگرام، مانسہرہ، صوابی، بونیر، شانگلہ، خیبر، مہمند اور ڈیرہ اسماعیل خان میں علم پیکٹ پروگرام کے ذریعے اسی ہزار آؤٹ آف اسکول بچوں کو تعلیم کی سہولت فراہم کی جائے گی۔
انہوں نے واضح کیا کہ صوبے بھر میں میرٹ کی بنیاد پر اٹھارہ ہزار نئے اساتذہ کی بھرتی کا عمل بھی جاری ہے تاکہ تعلیمی اداروں میں تدریسی عملے کی کمی کو پورا کیا جا سکے۔
وزیراعلیٰ کا کہنا تھا کہ ان کی حکومت بچوں کو معیاری تعلیم فراہم کرنے کے لیے پرعزم ہے اور اس مقصد کے لیے اسکولوں میں بنیادی سہولیات کی فراہمی کو ترجیح دی جا رہی ہے۔
انہوں نے کہا کہ ہمارا ہدف ہے کہ خیبرپختونخوا کا کوئی بھی بچہ ایسی کلاس میں تعلیم حاصل نہ کرے جہاں نہ کرسی ہو اور نہ میز۔
علم پیکٹ پروگرام کے تحت اساتذہ کو جدید خطوط پر تربیت دی جائے گی اور والدین اور اسکول مینجمنٹ کمیٹیوں کی صلاحیتوں میں بھی اضافہ کیا جائے گا۔
اس کے ساتھ ساتھ معاشرے کے محروم طبقات، خصوصاً نادار، اقلیتی، خصوصی بچوں اور بچیوں کی تعلیم پر خصوصی توجہ دی جائے گی۔
تعلیم کی اہمیت اجاگر کرنے کے لیے آگہی مہمات بھی چلائی جائیں گی جبکہ بچوں کو مفت درسی کتابیں، اسٹیشنری اور اسکول بیگز فراہم کیے جائیں گے۔
علم پیکٹ پروگرام نہ صرف خیبرپختونخوا میں شرح خواندگی کو بڑھانے میں مدد دے گا بلکہ طویل مدت میں تعلیمی معیار کو بہتر بنا کر معاشرتی ترقی کی بنیاد بھی فراہم کرے گا۔
