پاکستان نے تین میچوں پر مشتمل ٹی ٹوئنٹی سیریز کے پہلے میچ میں ویسٹ انڈیز کو 14 رنز سے شکست دے کر سیریز میں 0-1 کی برتری حاصل کر لی۔
لاؤڈر ہل، فلوریڈا میں کھیلے گئے میچ میں ویسٹ انڈیز کے کپتان شائی ہوپ نے ٹاس جیت کر پہلے فیلڈنگ کا فیصلہ کیا۔ پاکستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 178 رنز بنائے۔
صائم ایوب نے شاندار بیٹنگ کا مظاہرہ کرتے ہوئے 57 رنز بنائے اور پاکستان کی اننگز کے نمایاں بیٹر رہے، دیگر کھلاڑیوں میں فخر زمان نے 28 اور حسن نواز نے 24 رنز کی اننگز کھیلی۔
جواب میں ویسٹ انڈیز کی ٹیم 20 اوورز میں 7 وکٹوں پر 164 رنز ہی بنا سکی اور 14 رنز سے میچ ہار گئی، جانس چارلس اور جیویل اینڈریو نے 35، 35 رنز بنائے۔
پاکستان کی جانب سے محمد نواز نے عمدہ باؤلنگ کرتے ہوئے 3 کھلاڑیوں کو آؤٹ کیا، جبکہ صائم ایوب نے 2 وکٹیں حاصل کیں۔ شاہین شاہ آفریدی اور سفیان مقیم کے حصے میں ایک ایک وکٹ آئی۔
پاکستان ٹیم میں شامل کھلاڑیوں میں صاحبزادہ فرحان، صائم ایوب، فخر زمان، محمد حارث (وکٹ کیپر)، سلمان علی آغا (کپتان)، حسن نواز، محمد نواز، فہیم اشرف، شاہین آفریدی، حارث رؤف اور سفیان مقیم شامل تھے۔
یہ بھی پڑھیں: اسپین میں پاکستانی اسٹار کی چمک ،حمزہ خان نے سب کو پیچھے چھوڑ دیا
اب تک دونوں ٹیموں کے درمیان 22 ٹی ٹوئنٹی میچز کھیلے جا چکے ہیں، جن میں پاکستان نے 16 میں کامیابی حاصل کی جبکہ ویسٹ انڈیز صرف 3 میچز جیت سکی ہے, تین مقابلے بغیر کسی نتیجے کے مکمل ہوئے۔
