میران شاہ :شمالی وزیرستان میں قبائلی مشران و عمائدین نے پاک فوج کے تعاون سے ایک اہم جرگہ منعقد کیا، جس میں علاقائی امن کے قیام اور فتنہ الخوارج کے خاتمے کے لیے مکمل عزم کا اظہار کیا گیا۔
جرگے میں قبائلی عمائدین نے پاک فوج کی زیرو ٹالرنس پالیسی کی بھرپور حمایت کرتے ہوئے، سیکیورٹی فورسز اور شہداء کی قربانیوں کو خراج تحسین پیش کیا۔
جرگے میں شریک افراد نے متفقہ طور پر فتنہ الخوارج اور دیگر شر پسند عناصر کی روک تھام کے لیے حکام کے ساتھ مکمل تعاون کی یقین دہانی کرائی۔
پاک فوج کے مہمان خصوصی جنرل آفیسر کمانڈنگ میجر جنرل عادل افتخار وڑائچ نے قبائلی عوام کی قربانیوں کو سراہتے ہوئے کہا کہ قبائلی مشران کا کردار علاقے میں پائیدار امن کے قیام میں کلیدی حیثیت رکھتا ہے۔
یہ بھی پڑھیں : پشاور کے نواحی علاقے میں بڑا واقعہ، ریسکیو ٹیم نے بڑے نقصان سے بچا لیا
قبائلی مشران و عمائدین نے جرگے کے دوران پاک فوج کی طرف سے تعلیم اور صحت کے شعبوں میں خصوصاً بچیوں کی تعلیم کے فروغ کے لیے کی جانے والی کاوشوں پر اظہار تشکر کیا۔
یہ جرگہ علاقائی استحکام اور ترقی کے لیے ایک مثبت قدم قرار دیا جا رہا ہے جس سے شمالی وزیرستان میں امن و امان کی صورتحال مزید بہتر ہوگی۔
