پشاور: پاکستان تحریک انصاف کے مرکزی رہنما عمر ایوب اور سینیٹر شبلی فراز نے الیکشن کمیشن کی جانب سے ڈی نوٹیفائی کیے جانے کے خلاف پشاور ہائیکورٹ میں درخواست دائر کر دی۔
دونوں رہنماؤں نے یہ آئینی درخواستیں وکیل بشیر وزیر ایڈووکیٹ کی وساطت سے دائر کیں، جن میں الیکشن کمیشن آف پاکستان، اسپیکر قومی اسمبلی اور چیئرمین سینیٹ کو فریق بنایا گیا ہے۔
درخواست گزاروں نے مؤقف اختیار کیا کہ 5 اگست کو الیکشن کمیشن نے عمر ایوب کو بطور اپوزیشن لیڈر قومی اسمبلی اور شبلی فراز کو بطور سینیٹر نااہل قرار دیا۔
اس فیصلے کے خلاف پشاور ہائیکورٹ سے رجوع کیا گیا جس پر عدالت نے 6 اگست کو عبوری حکم جاری کرتے ہوئے الیکشن کمیشن کو مزید کارروائی سے روک دیا تھا۔
عدالت نے واضح ہدایت کی تھی کہ 5 اگست کے نوٹیفکیشن پر کسی قسم کی مزید پیش رفت نہ کی جائے۔ تاہم اس کے باوجود، اسپیکر قومی اسمبلی نے عمر ایوب اور چیئرمین سینیٹ نے شبلی فراز کو ڈی نوٹیفائی کرتے ہوئے ان کی نشستیں خالی قرار دے دیں۔
یہ بھی پڑھیں : 9 مئی کے دو مقدمات: شاہ محمود قریشی بری، 4 پی ٹی آئی رہنماؤں کو 10،10 سال قید کی سزا
درخواست میں موقف اپنایا گیا ہے کہ عدالتی حکم کے باوجود یہ اقدامات نہ صرف قانون سے انحراف ہیں بلکہ توہین عدالت کے زمرے میں بھی آتے ہیں۔
