قومی اسمبلی میں اپوزیشن رکن شیخ وقاص اکرم کی نشست خالی قرار دینے کا فیصلہ کر لیا گیا ہے۔ یہ فیصلہ آج ہونے والے قومی اسمبلی کے اجلاس میں متوقع ہے، جہاں ان کی رکنیت ختم کرنے سے متعلق تحریک ایوان میں پیش کی جائے گی۔
تفصیلات کے مطابق، قومی اسمبلی کا اجلاس آج صبح 11 بجے پارلیمنٹ ہاؤس اسلام آباد میں ہوگا، جس کی صدارت اسپیکر ایاز صادق کریں گے۔ اجلاس کے لیے 16 نکاتی ایجنڈا جاری کر دیا گیا ہے، جس میں شیخ وقاص اکرم کی نشست خالی قرار دینے سے متعلق تحریک بھی شامل ہے۔
نجی ٹی وی چینل (اے آر وائی نیوز)کے مطابق یہ تحریک حکومتی رکن سیدہ نوشین افتخار کی جانب سے ایوان میں پیش کی جائے گی، اور ایوان کی منظوری کے بعد شیخ وقاص اکرم کی قومی اسمبلی کی رکنیت ختم تصور کی جائے گی۔
واضح رہے کہ شیخ وقاص اکرم اپوزیشن کے فعال ارکان میں شمار ہوتے ہیں، اور ان کی نشست کے خالی ہونے کا فیصلہ سیاسی حلقوں میں خاصی توجہ کا مرکز بن گیا ہے۔ تاہم تاحال اس اقدام کی وجوہات سے متعلق سرکاری سطح پر کوئی تفصیلی بیان جاری نہیں کیا گیا۔
شیخ وقاص اکرم ماضی میں متعدد بار اسمبلی میں حزب اختلاف کی جانب سے اہم معاملات پر آواز بلند کر چکے ہیں، اور ان کی نشست خالی قرار دینے کا اقدام ممکنہ طور پر سیاسی اثرات بھی مرتب کر سکتا ہے۔ آج کا اجلاس اس حوالے سے اہم قرار دیا جا رہا ہے۔
