ضلع کرم کے علاقے لوئر کرم میں خوفناک واقعے میں اس وقت چھ افراد جاں بحق ہو گئے جب نامعلوم مسلح افراد نے ایک مسافر گاڑی پر اندھا دھند فائرنگ کر دی۔ واقعے کو ذاتی دشمنی کا نتیجہ قرار دیا جا رہا ہے، جبکہ علاقے میں شدید خوف و ہراس پھیل گیا ہے۔
پولیس کے مطابق یہ افسوسناک واقعہ لوئر کرم کے ایک حساس علاقے میں پیش آیا، جہاں ایک مسافر گاڑی کو نشانہ بنایا گیا۔ فائرنگ کی زد میں آ کر چھ افراد موقع پر ہی دم توڑ گئے۔ لاشوں کو فوری طور پر ضلعی ہیڈ کوارٹر اسپتال (ڈی ایچ کیو) منتقل کر دیا گیا ہے۔
پولیس کا کہنا ہے کہ ابتدائی تفتیش کے مطابق واقعہ ذاتی دشمنی کا شاخسانہ معلوم ہوتا ہے۔ جائے وقوعہ سے شواہد اکٹھے کر لیے گئے ہیں اور حملہ آوروں کی گرفتاری کے لیے سرچ آپریشن شروع کر دیا گیا ہے۔ حملہ آور فائرنگ کے بعد موقع سے فرار ہو گئے۔
واقعے کے بعد علاقے میں خوف و ہراس کی فضا قائم ہے جبکہ سیکیورٹی فورسز نے گشت اور نگرانی میں اضافہ کر دیا ہے۔ پولیس مختلف زاویوں سے تفتیش جاری رکھے ہوئے ہے تاکہ حقائق تک جلد از جلد رسائی حاصل کی جا سکے۔
