سابق امریکی صدر ڈونلڈ ٹرمپ نے بھارت کو خبردار کرتے ہوئے کہا ہے کہ روس سے تیل کی خریداری پر اب تک جو پابندیاں لگائی گئی ہیں وہ صرف ابتدائی قدم تھے، پابندیوں کا دوسرا اور تیسرا مرحلہ ابھی باقی ہے۔
وائٹ ہاؤس میں میڈیا سے گفتگو کرتے ہوئے ٹرمپ نے مودی حکومت پر واضح کیا کہ اگر روسی تیل کی خریداری جاری رہی تو بھارت کو مزید سخت اقدامات کا سامنا کرنا پڑے گا۔
ٹرمپ کا کہنا تھا کہ روس کو اربوں ڈالر کی آمدنی روکنے کے لیے امریکی اقدام مؤثر رہا ہے، مگر بھارت اور چین دونوں روسی تیل کے بڑے خریدار ہونے کی وجہ سے امریکی پالیسیوں میں رکاوٹ بنے ہوئے ہیں۔انہوں نے کہا’’ہم پہلے ہی خبردار کر چکے تھے کہ بھارت کو بڑے مسائل کا سامنا ہوگا۔ اگر روس سے تجارت ختم نہ کی گئی تو ہم اگلا قدم ضرور اٹھائیں گے۔‘‘
ڈونلڈ ٹرمپ نے یوکرین جنگ کے حوالے سے روسی صدر ولادیمیر پیوٹن پر ناراضی کا اظہار کرتے ہوئے کہا’’میں پیوٹن سے مایوس ہوں۔ پیوٹن اور زیلنسکی کو براہِ راست مذاکرات کرنے چاہییں۔ پیوٹن کو خود فیصلہ کرنا ہوگا کہ وہ ہمیں خوش رکھنا چاہتے ہیں یا ناخوش، اور اگر ہم ناخوش ہوئے تو یہ ان کے لیے اچھا نہیں ہوگا۔‘‘
چین اور روس کی بڑھتی ہوئی شراکت داری سے متعلق سوال پر ٹرمپ نے اطمینان ظاہر کرتے ہوئے کہا’’امریکا کے پاس دنیا کی سب سے طاقتور فوج ہے، چین اور روس کبھی امریکا پر فوجی طاقت استعمال کرنے کی جرات نہیں کریں گے۔‘‘
ٹرمپ نے موجودہ صدر جو بائیڈن کی پالیسیوں کو شدید تنقید کا نشانہ بناتے ہوئے دعویٰ کیا کہ وہ امریکا کی عظمت کو دوبارہ بحال کر رہے ہیں۔ ان کا کہنا تھا’’میں نے اپنے دور میں سات جنگیں رکوائیں، مگر کوئی اس پر بات نہیں کرتا۔ ہم امریکا سے جرائم اور منشیات کے خاتمے کے لیے بھرپور کام کر رہے ہیں۔‘‘
