راولپنڈی: مسلح افواج پاکستان نے 60ویں یومِ دفاع کے موقع پر شہداء اور ان کے اہلِ خانہ کو بھرپور خراجِ عقیدت پیش کیا ہے۔
پاک فوج کے شعبہ تعلقاتِ عامہ (آئی ایس پی آر) کے مطابق آرمی چیف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی، نیول چیف اور ایئر چیف نے اپنے پیغامات میں قوم کے ان سپوتوں کو سلام پیش کیا جنہوں نے ملک کے دفاع کے لیے اپنی جانوں کا نذرانہ پیش کیا۔
آئی ایس پی آر کے مطابق 6 ستمبر 1965ء پاکستانی قوم کے اٹل عزم اور ناقابلِ تسخیر جذبے کی علامت ہے۔
اس روز بہادر سپاہیوں نے قوم کی حمایت سے دشمن کے ناپاک عزائم کو ناکام بنایا، جو اسلحے اور تعداد میں کہیں زیادہ طاقتور تھا۔ ان کا کہنا ہے کہ شجاعت اور قربانی کے یہ کارنامے تاریخ میں لازوال نقش چھوڑ گئے ہیں۔
بیان میں کہا گیا ہے کہ متحد قوم کو شکست نہیں دی جا سکتی، ہمارے بے خوف ہیروز کی جرات آنے والی نسلوں کے لیے مشعلِ راہ ہے۔
شہداء اور ان کے اہل خانہ نے وطن کے لیے بے مثال قربانیاں دیں، قوم انہیں کبھی فراموش نہیں کرے گی۔
آئی ایس پی آر نے کہا کہ افواجِ پاکستان دہشت گردی اور بیرونی جارحیت کے خلاف ڈٹی ہوئی ہیں اور ہر قسم کے خطرے سے نمٹنے کے لیے ہمہ وقت تیار ہیں۔
قدرتی آفات اور مصیبتوں میں بھی افواجِ پاکستان نے عوام کا بھرپور ساتھ دیا، اور موجودہ سیلاب کے دوران امدادی سرگرمیاں جاری رکھی جائیں گی۔
بیان میں مزید کہا گیا کہ یومِ دفاع و شہداء انتہائی عاجزی اور انکساری کے ساتھ منایا جا رہا ہے۔
مسلح افواج اس مقدس ذمہ داری کو نبھانے کے عہد کی تجدید کرتی ہیں جو قوم نے انہیں سونپی ہے۔ امن کو سبوتاژ کرنے کی ہر کوشش کا منہ توڑ اور فیصلہ کن جواب دیا جائے گا۔
آخر میں دعا کی گئی کہ اللہ تعالیٰ پاکستان کو ہمیشہ امن، استحکام اور قوت عطا فرمائے۔
