سندھ کے ضلع شکارپور میں افسوسناک ٹریفک حادثے میں 7 قیمتی انسانی جانیں ضائع ہو گئیں جب ایک تیز رفتار ٹرک نے سڑک کنارے سوئے ہوئے افراد کو روند ڈالا۔ حادثے میں 6 افراد زخمی بھی ہوئے ہیں جنہیں فوری طور پر طبی امداد کے لیے اسپتال منتقل کر دیا گیا ہے
پولیس کے مطابق یہ اندوہناک واقعہ قومی شاہراہ کے بائی پاس کے مقام پر پیش آیا، جہاں سبزی سے لدے ٹرک نے سڑک کنارے آرام کرتے افراد کو کچل دیا۔ واقعے کے فوری بعد ریسکیو ٹیمیں اور پولیس موقع پر پہنچ گئی اور لاشوں و زخمیوں کو سول اسپتال شکارپور منتقل کیا گیا۔
پولیس حکام کا کہنا ہے کہ ابتدائی تحقیقات کے مطابق حادثہ تیز رفتاری کا نتیجہ معلوم ہوتا ہے۔ تاہم، ٹرک کو تحویل میں لے کر تحقیقات کا آغاز کر دیا گیا ہے، اور مکمل تفتیش کے بعد ہی کسی حتمی نتیجے پر پہنچا جا سکے گا۔
حادثے کے بعد علاقے میں فضا سوگوار ہو گئی۔ جاں بحق افراد کے لواحقین اسپتال پہنچے تو وہاں کہرام مچ گیا۔ مقامی افراد اور سماجی تنظیموں نے انتظامیہ سے مطالبہ کیا ہے کہ حادثے کی شفاف تحقیقات کی جائیں اور ذمہ داروں کو قرار واقعی سزا دی جائے۔
