وزیر دفاع خواجہ آصف نے بھارت کے خلاف سخت بیان دیتے ہوئے کہا ہے کہ اس دفعہ بھارت اپنے طیاروں کے ملبے میں دفن ہوگا۔
وزیر دفاع خواجہ آصف نے بھارتی فوجی اور سیاسی قیادت کے حالیہ بیانات کو اپنی خاک میں ملی ساکھ بحال کرنے کی ناکام کوشش قرار دیا۔
خواجہ آصف نے اپنے سوشل میڈیا اکاؤنٹ ایکس پر لکھا ہے کہ اگر بھارت نے دوبارہ کوئی مہم جوئی کی تو اس کا انجام اس کی تاریخ کی بدترین شکست سے بھی زیادہ تباہ کن ہوگا۔
خواجہ آصف نے کہا ہے کہ بھارتی فوجی اور سیاسی قیادت کے بیانات اپنی خاک میں ملی ساکھ کو بحال کرنے کی ناکام کوشش ہے۔
انہوں نے کہا کہ اتنی فیصلہ کن شکست کے بعد جس کا سکور 0-6 رہا ہو اگر دوبارہ کوشش کی تو سکور انشاءاللہ پہلے سے کہیں بہتر ہوگا۔
وزیر دفاع نے مودی حکومت کی عوامی رائے میں گراوٹ کا حوالہ دیتے ہوئے کہا کہ بھارت میں عوامی رائے تاریخ کی بدترین شکست کے بعد حکومت کے خلاف ہوئی اور مودی اور اس کا ٹولہ جس طرح اپنی ساکھ کھو بیٹھا اس کا پریشر لیڈرشپ کے بیانات سے ظاہر ہو رہا ہے۔
یہ بھی پڑھیں: بھارت کے اشتعال انگیز بیانات پر تشویش، نیا ڈرامہ کیا تو پاکستان کا ردعمل تباہ کن ہوگا،آئی ایس پی آر
خواجہ آصف نے پاکستان کی فوجی طاقت پر زور دیتے ہوئے کہا پاکستان اللہ کے نام پہ بنی ریاست ہے، ہمارے محافظ اللہ کے سپاہی ہیں، اس دفعہ بھارت انشاءاللہ اپنے طیاروں کے ملبے میں دفن ہوگا۔
