وزیراعظم محمد شہباز شریف اپنے دو روزہ سرکاری دورے کے لیے کوالالمپور روانہ ہو گئے ہیں۔ اس موقع پر نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ، اور وزیراعظم کے معاون خصوصی طارق فاطمی بھی وزیراعظم کے ہمراہ ملائیشیا کے دورے پر موجود ہیں۔
وزیراعظم شہباز شریف ملائیشیا کے وزیر اعظم انور ابراہیم کی خصوصی دعوت پر یہ دورہ کر رہے ہیں۔ اس دوران دونوں رہنما آپس میں ملاقات کریں گے اور وفود کی سطح پر مختلف امور پر بات چیت ہوگی۔ دونوں ممالک کے درمیان مختلف شعبوں میں تعاون کے معاہدوں اور مفاہمتی یادداشتوں پر دستخط بھی متوقع ہیں۔
پاکستان اور ملائیشیا کے وزرائے اعظم تجارت، آئی ٹی و ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر اور ڈیجیٹل معیشت کے شعبوں میں دوطرفہ تعاون کو مزید فروغ دینے پر بھی غور کریں گے۔ اس دورے کا ایک اہم مقصد عوام سے عوام کے روابط کو مضبوط بنانے کے لیے تعاون کے نئے مواقع تلاش کرنا بھی ہے۔
یہ دورہ پاکستان اور ملائیشیا کے تعلقات کو مزید گہرائی دینے اور علاقائی اور بین الاقوامی سطح پر مشترکہ مفادات کو آگے بڑھانے میں اہم کردار ادا کرے گا۔
