پاکستان تحریک انصاف کے پارلیمانی وفد نے گورنر خیبرپختونخوا فیصل کریم کنڈی سے ان کی اسلام آباد میں واقع رہائشگاہ پر ملاقات کی، خیبرپختونخوا میں نئے وزیراعلیٰ کے انتخاب کے حوالے سے تفصیلی مشاورت کی گئی۔
پی ٹی آئی کے وفد میں ارکان قومی اسمبلی اسد قیصر، عاطف خان، علی اصغر خان جدون، جنید اکبر اور ڈاکٹر امجد خان شامل تھے، جبکہ ملاقات میں پاکستان پیپلزپارٹی خیبرپختونخوا کے صدر محمد علی شاہ باچا بھی شریک ہوئے۔
ملاقات کے دوران پی ٹی آئی وفد نے گورنر سے گفتگو کرتے ہوئے کہا کہ پیپلزپارٹی نے ہمیشہ جمہوری روایات کی پاسداری کی ہے اور وزیراعلیٰ کے انتخابات میں بھی پیپلزپارٹی کے تعاون کی ضرورت ہے۔
گورنر خیبرپختونخوا فیصل کریم کنڈی نے کہا کہ علی امین خان گنڈاپور کے استعفے کی منظوری میں آئین و قانون کی مکمل پاسداری کی جائے گی، اپوزیشن جماعتوں سے مشاورت کے ساتھ صوبے کی ترقی کے لیے آگے بڑھا جا سکتا ہے۔
گورنر فیصل کریم کنڈی نے مزید کہا کہ خیبرپختونخوا میں پائیدار امن اور عوام کو سہولیات کی فراہمی کے لیے تمام سیاسی قوتوں کو مل کر کردار ادا کرنا ہو گا، انہوں نے کہا کہ پیپلزپارٹی جمہوری روایات اور جمہوریت کی مضبوطی کی علمبردار جماعت ہے۔
