پاکستان آرمی کی ٹیم نے بین الاقوامی سطح پر منعقد ہونے والی دنیا کی مشکل ترین فوجی مشق کیمبرین پٹرول 2025 میں شاندار کارکردگی کا مظاہرہ کرتے ہوئے گولڈ میڈل جیت لیا۔ یہ کامیابی نہ صرف فوج بلکہ پوری قوم کے لیے باعث فخر قرار دی جا رہی ہے۔
آئی ایس پی آر کے مطابق کیمبرین پٹرول مقابلہ برطانیہ کے علاقے ویلز میں 3 سے 13 اکتوبر 2025 تک منعقد ہوا۔ اس مشق کو عالمی سطح پر سب سے سخت اور چیلنجنگ فوجی مشقوں میں شمار کیا جاتا ہے، جس میں فوجی ٹیموں کو حقیقی جنگی حالات میں کارکردگی دکھانے کا موقع ملتا ہے۔
مشق میں شریک ٹیموں کو 48 گھنٹوں میں دشوار گزار علاقوں سے گزرتے ہوئے 60 کلومیٹر کا فاصلہ طے کرنا پڑا، دورانِ مشق مختلف عسکری فرائض، حکمت عملی، قیادت، سروائیول اسکلز اور ٹیم ورک کا مظاہرہ بھی ضروری تھا۔اس سال کی مشق میں دنیا کے 36 ممالک کی 137 ٹیموں نے شرکت کی، جن میں پاکستان آرمی کی ٹیم نے کیپٹن محمد سعد کی قیادت میں بہترین کارکردگی دکھا کر سب پر سبقت حاصل کی اور گولڈ میڈل اپنے نام کیا۔
آئی ایس پی آر کے مطابق،یہ کامیابی پوری قوم اور پاکستان آرمی کے لیے باعث فخر ہے۔ پاک فوج ہمیشہ کی طرح اپنی پیشہ ورانہ مہارت، اعلیٰ تربیت اور مضبوط عزم سے وطن عزیز کا پرچم بلند رکھے گی، اور یہ سلسلہ آئندہ بھی جاری رہے گا۔‘‘
