اندرون شہر واقع محکمہ اوقاف کی تاریخی عمارت ’’دارالمساکین‘‘ کو کرایہ داروں سے خالی کرا کے سیل کر دیا گیا ہے۔
نجی ٹی وی چینل (ایکسپریس نیوز)کے مطابق ضلعی انتظامیہ اور محکمہ اوقاف کی مشترکہ کارروائی میں یہ اقدام کیا گیا، جس کا مقصد زمین کو ازسرِ نو کارآمد بنانا اور فلاحی مقاصد کے لیے استعمال کرنا ہے۔
محکمہ اوقاف کے حکام کے مطابق عمارت کی جگہ پر ایک نئی اور جدید تعمیراتی منصوبہ شروع کیا جا رہا ہے جس میں دستکاری سینٹر بھی قائم کیا جائے گا، تاکہ مقامی افراد کو فنی تربیت اور روزگار کے مواقع فراہم کیے جا سکیں۔
حکام کا کہنا ہے کہ اس منصوبے میں تمام اسٹیک ہولڈرز کو نئی عمارت میں مناسب حصہ دیا جائے گا تاکہ کسی بھی فریق کے حقوق متاثر نہ ہوں۔ مقصد یہ ہے کہ تاریخی ورثے کی جگہ کو ضائع ہونے سے بچایا جائے اور اسے عصری تقاضوں کے مطابق سماجی فلاح کے منصوبے میں ڈھالا جائے۔
’’دارالمساکین‘‘پشاور کی ایک قدیم عمارت تھی جو ماضی میں نادار افراد کے لیے پناہ گاہ کے طور پر استعمال ہوتی رہی ہے۔ وقت کے ساتھ ساتھ اس میں مختلف دکانداروں اور کرایہ داروں نے جگہ گھیر لی تھی، جس سے نہ صرف عمارت کا تقدس متاثر ہوا بلکہ اس کا اصل مقصد بھی پس پشت چلا گیا۔
شہریوں اور سماجی حلقوں نے اس فیصلے کو مثبت قدم قرار دیتے ہوئے کہا ہے کہ اگر اس مقام کو جدید خطوط پر فلاحی استعمال میں لایا جائے تو یہ پشاور کے شہریوں کے لیے فائدہ مند ثابت ہو گا۔
