افغانستان کرکٹ بورڈ کی جانب سے پاکستان میں رواں سال نومبر میں شیڈول سہ ملکی ٹی ٹوئنٹی سیریز سے اچانک دستبرداری کے بعد، پاکستان کرکٹ بورڈ (پی سی بی) نے زمبابوے کرکٹ بورڈ سے رابطہ کر لیا ہے تاکہ سیریز کو متبادل ٹیم کے ساتھ جاری رکھا جا سکے۔
ذرائع کے مطابق پی سی بی نے فوری طور پر متبادل ٹیم کے طور پر زمبابوے کو سیریز میں شامل کرنے کے لیے باضابطہ طور پر رابطہ کیا ہے، اور اب امکان ظاہر کیا جا رہا ہے کہ ٹرائی نیشن سیریز پاکستان، سری لنکا اور زمبابوے کے درمیان کھیلی جائے گی۔
ابتدائی شیڈول کے مطابق یہ سیریز 17 سے 29 نومبر 2025 کے درمیان پاکستان میں منعقد ہونا تھی، تاہم افغانستان کی دستبرداری کے بعد پی سی بی کی جانب سے نئے شیڈول کا اعلان جلد متوقع ہے۔
افغان کرکٹ بورڈ نے چند روز قبل پاکستان میں شیڈول ٹرائی نیشن سیریز سے علیحدگی کا اعلان کیا تھا، تاہم اس فیصلے کی وجوہات پر سرکاری سطح پر کوئی واضح مؤقف سامنے نہیں آیا۔ سیریز میں افغانستان، پاکستان اور سری لنکا کی ٹیموں کو شرکت کرنا تھی۔
شائقین کرکٹ پی سی بی کے اگلے اقدام اور نئی ٹیم کی شمولیت کے حوالے سے باقاعدہ اعلان کے منتظر ہیں۔ ماہرین کے مطابق اگر زمبابوے کی شمولیت کی تصدیق ہو جاتی ہے تو یہ سیریز نہ صرف جاری رکھی جا سکے گی بلکہ ایک نیا دلچسپ مقابلہ بھی سامنے آئے گا۔
