پاکستان پیپلز پارٹی (پی پی پی) نے محمود اچکزئی کو نیا اپوزیشن لیڈر بنانے کی حمایت کردی۔
نجی ٹی وی پروگرام میں پیپلز پارٹی کے صوبائی وزیر ناصر حسین شاہ، وفاقی وزیر ڈاکٹر طارق فضل چوہدری اور پی ٹی آئی کے رہنما شہرام خان تراکئی نے شرکت کی۔
ناصر حسین شاہ نے دوران گفتگو محمود اچکزئی کو نیا اپوزیشن لیڈر بنانے اور وزیراعلیٰ خیبر پختونخوا سہیل آفریدی کی بانی پی ٹی آئی سے ملاقات کی حمایت کی۔
انہوں نے کہا کہ اپوزیشن اکثریت جسے بھی اپنا لیڈر نامزد کرے، اسے قائد حزب اختلاف بنا دینا چاہیے۔
صوبائی وزیر نے مزید کہا کہ وزیراعلیٰ سہیل آفریدی کی بانی پی ٹی آئی سے ملاقات بھی کروائی جانی چاہیے۔
ناصر حسین شاہ نے یہ بھی کہا کہ خیبر پختونخوا پولیس کو وہاں کے حالات کی وجہ سے بہتر گاڑیاں چاہئیں یہ مسئلہ حل کیا جانا چاہیے۔
اُن کا کہنا تھا کہ عالمی امداد کے بغیر سیلاب متاثرین کو ریلیف کی فراہمی ہمارے بس کی بات نہیں ہے۔
یہ بھی پڑھیں : پشتونخوا ملی عوامی پارٹی کے چیئرمین محمود اچکزئی قومی اسمبلی میں اپوزیشن لیڈر نامزد
پشتونخوا ملی عوامی پارٹی کے چیئرمین، محمود خان اچکزئی کو قومی اسمبلی میں اپوزیشن لیڈر نامزد کر دیا گیا ہے۔
اس سلسلے میں اپوزیشن کی جانب سے باضابطہ درخواست قومی اسمبلی کے سیکرٹری مشتاق کے دفتر میں جمع کرا دی گئی ہے۔
درخواست جمع کروانے والوں میں پی ٹی آئی کے چیف وہپ عامر ڈوگر، سابق اسپیکر اسد قیصر اور دیگر اپوزیشن رہنما شامل تھے۔ اپوزیشن اتحاد کے مجموعی طور پر 74 اراکین قومی اسمبلی نے محمود خان اچکزئی کی بطور اپوزیشن لیڈر حمایت کی ہے۔
پی ٹی آئی کے تین اراکین علی افضل ساہی، عمر فاروق اور صاحبزادہ محبوب سلطان—ملک سے باہر ہونے کے باعث درخواست پر دستخط نہ کر سکے۔ اس کے باوجود اپوزیشن کی طرف سے درکار حمایت مکمل ہے۔
قومی اسمبلی کے اسپیشل سیکرٹری مشتاق نے درخواست وصول کر لی ہے، جب کہ ایڈوائزر آفس کی جانب سے درخواست کو ڈائری نمبر الاٹ کر دیا گیا ہے، جس کے بعد اب اسپیکر قومی اسمبلی کی منظوری کا انتظار ہے۔
