کوہاٹ:کوہاٹ کے نائبرہڈ کونسل 2 پیر عبد اللہ شاہ اور ویلیج کونسل 3 بہادر کوٹ کی دو جنرل نشستوں پر ضمنی انتخابات جو پہلے 28 اکتوبر 2025 کو ہونے تھےبورڈ آف انٹرمیڈیٹ اینڈ سیکنڈری ایجوکیشن کوہاٹ کے زیر انتظام حالیہ میٹرک امتحانات کی وجہ سے ملتوی کیے گئے تھے۔
اب یہ انتخابات 2 نومبر 2025 کو ہوں گے، الیکشن کمیشن نے اس حوالے سے باقاعدہ اعلامیہ جاری کیا ہے۔
اعلامیے میں یہ بھی بتایا گیا ہے کہ ڈسٹرکٹ ریٹرننگ آفیسر ہنگو اصغر خان، جن کے پاس ڈسٹرکٹ الیکشن کمشنر کوہاٹ کا اضافی چارج تھا، کی جگہ ڈسٹرکٹ الیکشن کمشنر کوہاٹ حامد نواز کو ڈی آر او مقرر کیا گیا ہے۔
اس سے قبل الیکشن کمیشن نے خیبرپختونخوا کے سات اضلاع میں بلدیاتی نظام کی مختلف کیٹیگریز میں خالی ہونے والی 12 نشستوں پر تیسرے مرحلے کے ضمنی انتخابات 19 اکتوبر بروز اتوار کو منعقد کرانے کا اعلان کیا تھا۔
صوبائی الیکشن کمیشن کے جاری کردہ اعلامیے کے مطابق یہ ضمنی انتخابات کوہاٹ، ڈیرہ اسماعیل خان، ایبٹ آباد، مانسہرہ، ملاکنڈ، شانگلہ اور اپر دیر کے اضلاع میں ہوں گے۔
نشستیں جنرل، خواتین، کسان و مزدور، اور نوجوانوں کے لیے مخصوص کیٹیگریز میں خالی ہوئی تھیں، جنہیں پُر کرنے کے لیے تمام تر انتظامات مکمل کر لیے گئے ہیں۔الیکشن کمیشن کے مطابق مجموعی طور پر 88 ہزار 359 رجسٹرڈ ووٹرز اپنا حق رائے دہی استعمال کریں گے۔ اس مقصد کے لیے 66 پولنگ اسٹیشنز اور 201 پولنگ بوتھ قائم کیے گئے ہیں۔
سیکیورٹی کے پیش نظر 23 پولنگ اسٹیشنز کو حساس، جب کہ 5 کو انتہائی حساس قرار دیا گیا ہے۔ حساس پولنگ اسٹیشنز پر سیکیورٹی کیمرے نصب کیے جا رہے ہیں تاکہ انتخابی عمل کی نگرانی کو یقینی بنایا جا سکے۔
پولنگ عملے کو بیلٹ پیپرز سمیت دیگر انتخابی سامان ہفتے کے روز حوالے کیا جائے گا، جس کے بعد وہ اپنے متعلقہ پولنگ اسٹیشنز کی جانب روانہ ہو جائیں گے۔
انتخابی مہم کا وقت 17 اور 18 اکتوبر کی درمیانی شب ختم ہو جائے گا، جس کے بعد کسی بھی قسم کی سیاسی سرگرمی پر پابندی عائد ہو گی۔
یہ بھی پڑھیں : باجوڑ میں غیر قانونی کان کنی اور معدنیات کی ترسیل میں دو گرفتار، گاڑی ضبط
صوبائی الیکشن کمشنر نے عوام سے اپیل کی ہے کہ وہ 19 اکتوبر کو بلا خوف و خطر گھروں سے نکل کر اپنا ووٹ ڈالیں اور قومی فریضہ ادا کریں۔ ان کا کہنا تھا کہ الیکشن کمیشن آزاد، منصفانہ اور شفاف انتخابات کے انعقاد کے لیے پُرعزم ہے۔
