سہیل آفریدی نے کہا ہے کہ اگر ججز یرغمال ہیں تو عوام کو بتائیں، عدالتوں کی بے بسی قانون کی بالادستی میں رکاوٹ ہے۔
تفصیلات کے مطابق وزیراعلیٰ خیبرپختونخوا سہیل آفریدی نے کہا ہے کہ اگر ججز یرغمال ہیں تو عوام کو مطلع کیا جائے تاکہ انہیں آزاد کرایا جا سکے۔ یہ بات انہوں نے پشاور کے وزیراعلیٰ ہاؤس میں جسٹس لائرز فورم کے 94 وکلاء کی انصاف لائرز فورم میں شمولیت کی تقریب میں خطاب کرتے ہوئے کہی۔
سہیل آفریدی نے کہا کہ میری عمران خان سے ملاقات کرانے کے عدالتی احکامات کو ردی کی ٹوکری میں پھینک دیا گیا، اور سڑک پر بیٹھنا میری کمزوری نہیں بلکہ عدالتوں کی بے بسی ہے جو اپنے احکامات پر عملدرآمد کرانے سے قاصر ہیں۔
انہوں نے مزید کہا کہ حکومت ایک ’’ایک ریاست، دو دستور‘‘ کے کلچر کو ختم کرنے کے لیے کام کر رہی ہے، اور 26 ویں آئینی ترمیم نے عدالتوں کو مفلوج کر دیا ہے۔ ان کے مطابق، حکومت کی جدوجہد حقیقی آزادی، آئین و قانون کی بالادستی، اور میڈیا کی آزادی کے لیے ہے، جس میں وکلاء برادری کا مرکزی کردار ہے۔
وزیراعلیٰ نے اعلان کیا کہ صوبے کی بار ایسوسی ایشنز کے لیے 42 کروڑ روپے کی گرانٹس منظور ہو چکی ہیں جو چند روز میں فراہم کی جائیں گی۔ انہوں نے کہا کہ آئین اور قانون سب کے لیے برابر ہیں اور طاقتور یا ناانصافی کرنے والوں کو بھی انصاف کے کٹہرے میں لانا لازمی ہے، تاکہ آئین کو’’مکڑی کے جالے‘‘ کی طرح نہ بنایا جا سکے جس میں کمزور پھنس جائے اور طاقتور نکل جائے۔
