واٹس ایپ جلد اپنے تمام صارفین کے لیے پروفائل کور فوٹو سیٹ کرنے کی سہولت متعارف کرانے والا ہے جو اس سے قبل صرف واٹس ایپ بزنس صارفین کے لیے دستیاب تھی۔
ویبیٹا انفو کے مطابق نئی اپ ڈیٹ میں صارفین اپنے پروفائل سیٹنگز کے ذریعے کور فوٹو اپ لوڈ کر سکیں گے، بالکل ویسے ہی جیسے فیس بک یا لنکڈ اِن پر کور فوٹو سیٹ کی جاتی ہے۔ منتخب تصویر صارف کے پروفائل کے اوپر نظر آئے گی، جس سے پروفائل کو زیادہ ذاتی اور منفرد انداز ملے گا۔
واٹس ایپ میں کور فوٹو کے لیے پرائیویسی سیٹنگز بھی شامل کی جا رہی ہیں، جن میں “مائی کانٹیکٹس”، “نو باڈی” اور “ایوری ون” کے آپشنز موجود ہوں گے۔ اگر صارف “ایوری ون” منتخب کرے تو کور فوٹو سب کو نظر آئے گا، مائی کانٹیکٹس کی صورت میں یہ صرف محفوظ نمبرز تک محدود رہے گا، جبکہ “نو باڈی” کا مطلب ہے کہ کور فوٹو مکمل طور پر پوشیدہ رہے گا۔
یہ فیچر فی الحال واٹس ایپ بیٹا ورژن 2.25.32.2 میں ٹیسٹنگ کے مراحل میں ہے، جو گوگل پلے بیٹا پروگرام پر دستیاب ہے۔
تمام صارفین کے لیے یہ فیچر ابھی فعال نہیں لیکن اس سے ظاہر ہوتا ہے کہ میٹا کی ملکیت والی کمپنی واٹس ایپ کو زیادہ ذاتی اور پرکشش بنانے کے لیے نئے فیچرز پر کام کر رہی ہے۔ نئے فیچر کے باضابطہ اجرا کے بعد، صارفین اپنے پروفائل کو کور امیجز کے ذریعے مزید دلکش انداز میں پیش کر سکیں گے۔
یہ بھی پڑھیں : اے آئی ’رائٹنگ ہیلپ‘ فیچر متعارف، اب واٹس ایپ خود لکھے گا
واٹس ایپ نے صارفین کے لیے ایک نیا اور انقلابی فیچر متعارف کرایا ہے جس کا نام ’رائٹنگ ہیلپ‘ ہے۔
یہ فیچر مصنوعی ذہانت(اے آئی) پر مبنی ایک تحریری معاون ہے جو چیٹنگ کے دوران پیغامات تجویز کرتا ہے تاکہ بات چیت کو تیز، آسان اور مؤثر بنایا جا سکے۔
نیا فیچر نجی اور گروپ دونوں طرح کی چیٹس میں کام کرتا ہے اور صارفین کو مختلف انداز میں تجاویز فراہم کرتا ہے جن میں پیشہ ورانہ، مزاحیہ اور حوصلہ افزا انداز شامل ہیں۔
نیا متعارف کرایا گیا اے آئی فیچر ’رائٹنگ ہیلپ‘ کا مقصد صارفین کو بہتر انداز میں اظہار رائے کی سہولت دینا اور وقت کی بچت فراہم کرنا ہے۔
واٹس ایپ کے مطابق ’رائٹنگ ہیلپ‘ روزمرہ کی چیٹنگ کو زیادہ مؤثر بنائے گا بغیر اس کے کہ صارفین کو اپنے روایتی انداز میں تبدیلی لانا پڑے۔
صارفین پیغام لکھتے وقت اس فیچر کو پینسل کے آئیکون پر ٹیپ کرکے فعال کر سکتے ہیں، اس کے بعد واٹس ایپ متعدد اے آئی سے تیار کردہ پیغاماتی تجاویز دکھاتا ہے جن میں سے کوئی بھی منتخب کی جا سکتی ہے یا انہیں مکمل طور پر نظر انداز بھی کیا جا سکتا ہے۔
یہ فیچر میٹا کی پرائیویٹ پروسیسنگ ٹیکنالوجی پر مبنی ہے جو پیغامات کی مکمل رازداری کو یقینی بناتی ہے۔
کمپنی نے واضح کیا ہے کہ نہ میٹا اور نہ ہی واٹس ایپ صارفین کے اصل یا تجویز کردہ پیغامات دیکھ سکتے ہیں۔
فیچر کو مکمل طور پر اختیاری رکھا گیا ہے تاکہ جو صارفین خود ٹائپ کرنا پسند کرتے ہیں، ان کے لیے کوئی رکاوٹ پیدا نہ ہو۔
