وفاقی وزیر برائے امورکشمیر و گلگت بلتستان انجینئر امیر مقام نے کہا ہے کہ ملک کا امن و امان سب سے مقدم ہے اور اس کے لیے ہر شہری کو اپنا مثبت کردار ادا کرنا ہوگا۔
تفصیلات کے مطابق امیر مقام نے یہ بات پشتون و مستحکم پاکستان گرینڈ کنونشن سے خطاب کرتے ہوئے کہی اور کہا کہ خیبر پختونخوا کے عوام ملک کی ترقی اور خوشحالی میں ایک اہم ستون ہیں۔ انہوں نے واضح کیا کہ چند عناصر ملک کی ترقی کو ہضم نہیں کر پا رہے، لیکن صوبائی حکومت عوام کی فلاح و بہبود کو اولین ترجیح دے رہی ہے اور عوامی مسائل کے حل پر توجہ مرکوز کر رہی ہے۔
وفاقی وزیر نے مزید کہا کہ خیبر پختونخوا کے عوام دہشت گردی کے خلاف جنگ میں سکیورٹی فورسز کے ساتھ کھڑے ہیں اور معرکہ حق میں پاکستان نے عظیم کامیابیاں حاصل کی ہیں۔ انہوں نے زور دیا کہ ملک انتشار اور فساد کی سیاست برداشت نہیں کر سکتا اور قیام امن کے لیے صوبائی حکومت کو خصوصی اقدامات کرنے ہوں گے۔
امیر مقام نے پشتون قوم کی قربانیوں کو یاد کرتے ہوئے کہا کہ پشتون ہمیشہ قومی پرچم کے محافظ رہے ہیں اور پاکستان کی ترقی میں ان کا خون اور پسینہ شامل ہے۔ انہوں نے کہا کہ خیبر پختونخوا کی قیادت نے تحریک آزادی میں بھرپور کردار ادا کیا اور جب سارا ہندوستان ایک تھا، تو ریفرنڈم کے ذریعے اس خطے کے پشتونوں نے پاکستان کے ساتھ ہونے کا انتخاب کیا۔
انہوں نے کہا کہ کشمیر کی ابتدائی جنگ میں پشتون قبائل نے پاک فوج کے شانہ بشانہ کم وسائل کے باوجود پیدل سفر کر کے موجودہ آزاد جموں و کشمیر کے علاقوں کو آزاد کرایا۔ دہشت گردی کے خلاف جنگ میں بھی پشتون فرنٹ لائن پر ہیں، لیکن چند عناصر نے ذاتی مفادات کے لیے پشتونوں کو استعمال کرنا شروع کر دیا، جو قابل افسوس ہے۔
امیر مقام نے مزید بتایا کہ مئی میں مختصر جنگ کے دوران اگر افواج پاکستان ایک مضبوط پوزیشن میں نہ ہوتیں تو ملک کا وجود بھی خطرے میں آ سکتا تھا۔ انہوں نے تمام شہریوں سے اپیل کی کہ وہ ملک کے امن اور ترقی کے لیے اپنا کردار بخوبی ادا کریں۔
