استنبول: ترکیہ کے شہر استنبول میں آج غزہ امن منصوبے پر مشاورتی اجلاس ہونے جا رہا ہے، جس میں پاکستان سمیت 8 ممالک کے وزرائے خارجہ شریک ہوں گے۔
پاکستان کی نمائندگی نائب وزیراعظم اور وزیر خارجہ اسحاق ڈار کریں گے۔
اجلاس میں سعودی عرب، قطر، متحدہ عرب امارات، انڈونیشیا، اردن اور مصر کے وزرائے خارجہ بھی شریک ہوں گے۔
اس اجلاس کا مقصد غزہ میں جنگ بندی پر عمل درآمد اور انسانی امداد کی فراہمی کے حوالے سے مشترکہ حکمت عملی طے کرنا ہے۔
دفتر خارجہ کے ترجمان طاہر اندرابی کے مطابق پاکستان اجلاس میں غزہ میں امدادی سامان کی فراہمی میں رکاوٹوں اور اسرائیل کی جانب سے انسانی امداد کے وعدے پورے نہ کرنے کے معاملے پر بھی بات کرے گا۔
پاکستان مکمل جنگ بندی، بلا رکاوٹ انسانی امداد اور غزہ کی تعمیرِ نو پر زور دے گا اور فلسطینی عوام کے حقِ خودارادیت کے لیے پرعزم رہے گا۔
یہ بھی پڑھیں : 9 مئی کو ریڈیو پاکستان پر حملے میں کوئی ابہام نہیں، سب نے جلاؤ گھیراؤ دیکھا، عطا تارڑ
انہوں نے مزید کہا کہ پاکستان آزاد، قابلِ بقا اور متصل فلسطینی ریاست کے قیام پر زور دے گا اور اس کا دارالحکومت القدس الشریف ہونا چاہیے۔
یاد رہے کہ غزہ میں اسرائیل کی جانب سے جنگ بندی کی خلاف ورزیوں کے نتیجے میں اب تک 236 فلسطینی شہید اور 600 سے زائد زخمی ہو چکے ہیں۔
