گورنر خیبرپختونخوا فیصل کریم کنڈی نے کہا ہے کہ سابق وزیراعلیٰ نے صوبے کو دہشت گردی اور کرپشن کا تحفہ چھوڑا ہے، جبکہ موجودہ وزیراعلیٰ سہیل آفریدی کے لیے بڑے مسائل بھی چھوڑے گئے ہیں۔
میڈیا سے گفتگو کرتے ہوئے گورنر نے کہا کہ وزیراعلیٰ نئے ہیں اور انہیں اصلاحات کے لیے وقت دینا چاہیے۔ انہوں نے مزید کہا کہ صوبے اور وفاق کے درمیان پل کا کردار ادا کر رہا ہوں اور عہدہ کسی جائیداد کی طرح نہیں بلکہ یہ پارٹی کی امانت ہے۔
فیصل کریم کنڈی نے وزیراعظم کے این ایف سی ایوارڈ کے وعدے کا بھی ذکر کرتے ہوئے کہا کہ امید ہے کہ جلد اس پر عمل کیا جائے گا۔
گورنر کے مطابق سابق وزیراعلیٰ کے دوران چھوڑے گئے چیلنجز سے نمٹنے کے لیے موجودہ حکومت کو مضبوط حکمت عملی اپنانے کی ضرورت ہے تاکہ صوبے میں امن و استحکام اور ترقی کو یقینی بنایا جا سکے۔
