اسلام آباد: گلگت بلتستان اور خیبرپختونخوا کے سیاحتی علاقوں میں برفباری کے بعد سردی کی شدت میں مزید اضافہ ہوگیا ہے۔
گلگت بلتستان کے پہاڑوں پر برفباری کا سلسلہ دوبارہ شروع ہوگیا ہے، جبکہ بابوسر، نانگا پربت اور بٹوگاہ کی چوٹیوں پر برفباری وقفے وقفے سے جاری ہے۔ اس دوران 12 سے زائد گاڑیاں برف میں پھنس گئی ہیں۔
خیبرپختونخوا کے سوات، دیر اور کالام کے پہاڑوں پر بھی برفباری ہوئی ہے، جبکہ اپر ہزارہ ڈویژن میں موسم سرما کی پہلی بارش اور ژالہ باری نے سردی کی شدت کو مزید بڑھا دیا، دن کے وقت بھی رات جیسا ماحول رہا۔
ایوبیہ، نتھیاگلی اور چھانگلہ گلی سمیت بالائی گلیات میں تقریباً 2 سے 3 انچ برف پڑ چکی ہے۔
مظفرآباد سے وادی نیلم تک بارش اور برفباری کے باعث موسم مزید سرد ہوگیا ہے۔
متعلقہ انتظامیہ نے شہریوں کو ہدایت کی ہے کہ خراب موسم کے دوران غیر ضروری سفر سے گریز کریں۔
پروونشل ڈیزاسٹر منیجمنٹ اتھارٹی (پی ڈی ایم اے) نے خیبرپختونخوا کے مختلف علاقوں میں آج بھی وقفے وقفے سے بارش اور برفباری کی پیشگوئی کی ہے اور تمام اضلاع کی انتظامیہ کو پیشگی اقدامات کے حوالے سے الرٹ رہنے کی ہدایت کی گئی ہے۔
یہ بھی پڑھیں : آج سے شروع ہونے والا بارش اور برفباری کا سلسلہ کتنے دن جاری رہے گا؟ جانئے
ملک کے بالائی علاقوں میں بارشوں اور برفباری کا سلسلہ شروع، کب تک جاری رہے گا؟
محکمہ موسمیات کے مطابق مغربی ہواؤں کا نیا سلسلہ آج رات سے ملک کے بالائی علاقوں میں داخل ہو رہا ہے، جو 5 نومبر تک موجود رہے گا۔ اس دوران مختلف علاقوں میں بارش اور بلند پہاڑی مقامات پر برفباری کی پیشگوئی کی گئی ہے۔
تفصیلات کے مطابق چترال، دیر، سوات، کوہستان، ایبٹ آباد، ہری پور، صوابی، پشاور، مردان، کوہاٹ، کشمیر اور مظفرآباد میں گرج چمک کے ساتھ بارش اور پہاڑوں پر برفباری کا امکان ہے۔
اس کے علاوہ اسلام آباد، راولپنڈی میں مزید بادل برسنے کا امکان ظاہر کیا گیا ہے۔
