وزیر اعلیٰ خیبرپختونخوا محمد سہیل آفریدی سے سینیٹ کی قائمہ کمیٹی برائے بین الصوبائی رابطہ کے وفد نے ملاقات کی، جس میں انہیں منصب سنبھالنے پر مبارکباد پیش کی گئی۔
اجلاس میں پنجاب حکومت کی جانب سے گندم کی آزاد نقل و حرکت پر پابندیوں کے معاملے پر غور کیا گیا۔ وزیر اعلیٰ سہیل آفریدی نے اس موقع پر واضح کیا کہ آرٹیکل 151 کے تحت بین الصوبائی تجارت تمام صوبوں کا آئینی حق ہے اور کسی صوبے کو خوراک یا دیگر اجناس کی ترسیل روکنے کا اختیار نہیں ہے۔
وزیر اعلیٰ نے کہا کہ سیاسی اختلافات اپنی جگہ، مگر عوام کے رزق پر سیاست نہیں ہونی چاہیے۔ انہوں نے سینیٹ وفد کو خیبرپختونخوا کے عوام کا سفیر قرار دیتے ہوئے کہا کہ گندم کے مسئلے کے حل کے لیے بین الصوبائی ہم آہنگی ضروری ہے۔
ملاقات میں سینیٹ کے ارکان دلاور خان، محسن عزیز، نسیمہ احسان، ناصر محمود، ہدایت اللہ خان، نیاز احمد اور مصدق مسعود کے علاوہ مشیر خزانہ مزمل اسلم، سیکرٹری خوراک شاہ محمود اور دیگر حکام بھی شریک تھے۔
