قومی کرکٹ ٹیم کے سابق کپتان شاہد خان آفریدی نے کہا ہے کہ انہوں نے اپنا فیصلہ بدل لیا ہے اور اب سیاست سے دور رہنا چاہتے ہیں۔
ایک تقریب کے دوران آفریدی سے سوال کیا گیا کہ بعض لوگ سوشل میڈیا پر آپ اور ملک کے دیگر ہیروز کے خلاف منفی مہم چلاتے ہیں حالانکہ آپ ہمیشہ وطن اور ہیروز کے ساتھ کھڑے رہے ہیں۔
جواب میں شاہد آفریدی نے کہا کہ اگر مجھے ان کی باتوں کی پرواہ ہوتی تو میں کبھی بھی بیان نہیں دیتا، انہوں نے کہا کہ ان کا مقصد سوشل میڈیا پر جھوٹ بول کر لائیکس یا ویوز حاصل کرنا نہیں ہے اور نہ ہی یہ ان کا روزگار ہے۔
آفریدی نے مزید کہا کہ وہ سوشل میڈیا پر جھوٹ بول کر اپنی اولاد کے لیے حرام کمائی نہیں لا سکتے، اسی لیے وہ اسے زیادہ استعمال بھی نہیں کرتے۔
سیاست میں شمولیت کے حوالے سے سوال پر آفریدی نے کہا کہ ان کے لیے بہتر یہی ہے کہ وہ سیاست سے دور رہیں۔
یہ بھی پڑھیں: افغانستان نے تمام احسانات کو فراموش کیا ،شاہد آفریدی
انہوں نے کہا کہ ان کے پاس ایک ہی پارٹی کا راستہ تھا لیکن 2019 یا 2020 میں انہوں نے اپنا ذہن بدل کر فیصلہ کیا کہ سیاست ان کے بس کی بات نہیں اور وہ اس میں حصہ نہیں لینا چاہتے۔
