خیبرپختونخوا میں اپریل تک انفلوئنزا وائرس کے پھیلاؤ کا خطرہ بڑھ گیا ہے، جس کے پیش نظر محکمہ صحت نے صوبے بھر میں ہنگامی ایڈوائزری جاری کردی ہے۔
محکمہ صحت کے مطابق یہ ایڈوائزری نیشنل انسٹی ٹیوٹ آف ہیلتھ، اسلام آباد کی سفارشات کی بنیاد پر تیار کی گئی ہے، جس میں فلو سے بچاؤ، کنٹرول اور علاج کے جامع ہدایات شامل ہیں۔ ایڈوائزری میں واضح کیا گیا ہے کہ فلو سے بچاؤ کی ویکسین ایک مؤثر حفاظتی اقدام ہے۔
محکمہ صحت نے خبردار کیا ہے کہ نومبر سے اپریل تک انفلوئنزا کے کیسز میں اضافہ متوقع ہے، خاص طور پر بزرگ شہری، 5 سال سے کم عمر بچے اور حاملہ خواتین محتاط رہیں۔ دائمی بیماریوں کے شکار افراد کو خصوصی احتیاطی تدابیر اختیار کرنے کی ہدایت کی گئی ہے۔
ایڈوائزری میں کہا گیا ہے کہ ہاتھوں کی صفائی اور ماسک کے استعمال سے وائرس کے پھیلاؤ کو کم کیا جا سکتا ہے، اور شہریوں سے اپیل کی گئی ہے کہ وہ ہدایات پر عمل کریں تاکہ صحت کے خطرات سے بچا جا سکے۔
